यदि तपाईँ झुक्किएर वा डुल्दाडुल्दै यहाँ आइपुग्नु भएको भए नयाँ ठेगाना याद राख्नुस्- www.merosansar.com.np

२०६२ माघ १९, बुधबार
एक वर्षअगाडि आज कै दिन राजाले प्रतिगमनकारी कदम चालेका थिए, सञ्चार माध्यममा समेत हतियार बोकेका सैनिक पठाएर समाचार सेन्सर गराउने धृष्टता गरेको थियो। आज त्यही दिन ‘मेरो संसार’ ले निजी सर्भरमा जाने निधो गरेको छ। अर्थात् हामी निःशुल्क बस्न पाइने धर्मशालालाई त्यागेर भाडा तिरेर बस्ने राम्रो कोठामा आइपुगेका छौं। कसैलाई लाग्ला, किन यही दिन रोज्नु पर्‍यो ? किनभने यही दिनबाट नै नेपालीहरुमाझ वैकल्पिक समाचारको स्रोतका रुपमा ब्लग अगाडि आउन सुरु गरेको हो। ब्लगका लागि यो दिनको महत्त्व राजाका लागि शाही घोषणा भन्दा पनि महत्त्वपूर्ण छ।

मेरो संसारले गत वर्ष अप्रिल महिनामा अर्थात् २०६१ को चैत महिनामा ब्लग सुरु गरेदेखि नै ब्लगसमको निःशुल्क स्थानको उपयोग गर्दै आएको थियो। यसबीच मेरो संसारको सफलताबाट इर्ष्या गर्नेहरुले विभिन्न बहाना बनाएर ब्लगसममा उजुरी हालेर झण्डै २४ घण्टा साइट सस्पेन्ड समेत गराउन सफल भएका थिए। निजी सर्भरमा गइसकेपछि उनीहरुलाई यस्तो गर्न गार्‍है पर्नेछ।

www.merosansar.com.np टाइप गरी यो ब्लग हेरिरहनुभएकाहरुले कुनै परिवर्तन गर्नुपर्ने छैन। ज-जसले merosansar.blogsome.com टाइप गरी हेरिरहेका हुन्, उनीहरुले अबदेखि www.merosansar.com.np मा गए मात्र ताजा ब्लगहरु हेर्न पाउने छन्। पुराना ब्लग र त्यसमा भएका कमेन्टहरु यहीँ रहनेछन्। नयाँ घरमा त्यसलाई सार्ने क्रम जारी रहनेछ।

यो साइटबाट RSS फिड लिइरहेकाहरुलाई परिवर्तित ठेगानाबाट RSS फिड लिन हुन अनुरोध छ।

आजैबाट मेरो संसारले Interact System Pvt. Ltd. सितको सहकार्यमा www.merosansar.info पनि सञ्चालन गर्ने घोषणा गर्दछ। यसमा ब्लगबाहेक अन्य सेवाहरु सञ्चालन हुनेछन्। हामीले हाल विश्वमा लोकप्रिय भइरहेको सिटिजन जर्नलिज्म अर्थात् नागरिक पत्रकारितामा आधारित रहेर एउटा सेवा सुरु गर्ने विचार गरेका छौं। त्यस्तै फोरम पनि सञ्चालन गर्ने हाम्रो सोच रहेको छ।

आज कै दिन मेरो संसारले आफ्ना केही ऐतिहासिक भिडियो ब्लग समेटिएको भिसिडीको पहिलो भाग सार्वजनिक गर्ने जमर्को गरेको छ। यसको विमोचन तपाईँ पाठक कै हातबाट गरिनेछ। कृपया यहाँ क्लिक गरी यो भिसीडीको विमोचन गर्नुका साथै एक झलक हेरिदिनु हुन अनुरोध छ। माथि क्लिक गर्दा भिडियो नखुलेमा भित्र आउनुहुन अनुरोध छ। भिसिडीको बारेमा थप जानकारी पनि भित्र (more…)

राजाले आफूले शासन सत्ता हातमा लिएको एक वर्ष पुगेको दिन भोलि बिहान ९ बजे विशेष सम्बोधन गर्ने समाचार सार्वजनिक भएपछि अनुमानको बजार तातिएको छ। कतिले अनुमान गरिरहेका छन्, एक वर्षअगाडिको भन्दा कडा कदम चालिन सक्छ। कोही भन्छन्- राजमुकुट नै खतरामा पर्ने भएकाले राजाले केही सम्झौताको बाटो अंगाल्न सक्छन्। के होला त भोलि ? (more…)

द ग्रेट नेपाली कमेडी सो बन्न पुगेको नगर निर्वाचनका ‘जोकर’ उम्मेदवारहरुको बारेमा विभिन्न पत्रपत्रिकाहरुमा समाचार पढ्न पाइएकै थियो, आज स्वतन्त्र समाचार सेवाको एउटा समाचार हेरेपछि त बिचराहरु कति दयनीय अवस्थामा रहेछन् भन्ने पनि बुझियो। जनकपुरमा मेयर बन्न उठेका रमन सिंहलाई आफ्नै पत्नीले समेत मत नदिने भनेपछि बिचरा धुरुधुरु रोएछन्। (more…)

२०६२ माघ १७, सोमबार

सूचनाः माथिको फोटो र भित्रको भिडियोमा तपाईँले मुसा नदेखी दुई खुट्टे पशु देख्नुभएको भए आँखाको उपचार गराउन लोकतन्त्रप्रेमी डाक्टरकहाँ सम्पर्क गर्न सूचित गरिन्छ।

एकादेशको मान्छे भनुँ भने मान्छे हैन, देउता हैन भने देउता हैन खालको प्राणीले थापेको चुनावी पासोलाई सफल बनाउन मुसाहरु दुला बाहिर निस्केको पहिलो पटक आज देख्न पाइयो। ‘बिरालो’ले “खाइदिन्छु है” भनी धम्क्याएका कारण मुसाहरुको लहरे जुलुस अगाडि-पछाडि ‘ब्वाँसा’हरुको सुरक्षा पनि देखिन्थ्यो। यस्तो जुलुस निकाल्नका लागि मुसाका नेताले राज्यको भकारीमा दुलो पारी कति अन्न निकाले होलान् हगि ? (more…)

२०६२ माघ १७, सोमबार

लोकतान्त्रिक स्रष्टाहरुको संयुक्त मञ्चले आज पाटनको यलमाया केन्द्रमा लोकतान्त्रिक सिर्जना प्रदर्शनीको आयोजना गर्‍यो। भाषण र नाराबाजीभन्दा बेग्लै र केही हिसाबमा त त्योभन्दा सशक्त हुने गर्छ यसबाट निस्कने विरोधका आवाज र भाव। हिजो नयाँ बानेश्वरमा वाचन गरिएका केही कविता साँच्चिकै बन्दूकको गोलीभन्दा बढी असर पार्ने खालका थिए। प्रदर्शनीमा फोटो, कार्टुन, मूर्ति, चित्रकला आदि प्रदर्शन गरिएको थियो। त्यसैगरी लोकतान्त्रिक चलचित्रकर्मीहरुले बनाएको २० मिनेट लामो आवाज शीर्षकको चलचित्र पनि प्रदर्शन गरिएको थियो। भित्र हेर्नुस् प्रदर्शनीमा खिचिएका थप २१ फोटोहरु। (more…)

गत वर्ष माघ १९ को शाही कदमकाविरुध्द वासिङटन डीसीवासी नेपालीहरुले आइतबार एक विरोध र्‍यालीको आयोजना गर्दै राजतन्त्रको विरोधमा चर्का नाराबाजी गरेका छन् शाही कदमका विरुध्द अन्तराष्ट्रिय जनमत सृजना गर्नका लागि ह्वाइटहाउसअगाडि सम्पन्न विरोध र्‍यालीमा झण्डै दुई सय नेपालीहरुको सहभागिता रहेको थियो।

उक्त अवसरमा नेपालमा लोकतन्त्र बहाली, मानवअधिकारको ग्यारेन्टी, राजनीतिक बन्दीहरुको बिना शर्त रिहा, सैनिक घेराभित्र गरिन लागेको नगर निर्वाचनको स्थगन गरिनुपर्ने, माओवादी र सात दलबीचको १२ बूँदे सहमतिका आधारमा द्धन्द्ध समाधानका लागि पहल गरिनुपर्ने, प्रेस स्वतन्त्रताको बहाली लगायतका मागको नारा, प्लेकार्ड र व्यानर सहितको जुलुसले ह्वाइटहाउस अगाडि परिक्रमा गरेको थियो। (more…)

२०६२ माघ १६ आइतबार
भिडियो हेर्नका लागि तलको प्लेयरमा क्लिक गर्नुहोला।

टिप्सः यदि तपाईँको इन्टरनेट कनेक्सन स्लो छ भने पहिला बायाँ छेउको पज बटन थिचेर एक छिन पछि पुनः सोही बटन थिचेर हेर्नुभएमा आरामसित हेर्न सकिन्छ।

तपाईँले हाल निःशुल्क हेरिरहनुभएको यस्तो भिडियो ब्लगका लागि निकै समय र परिश्रमको आवश्यकता पर्छ। कृपया केही रकम सहयोग गरी यसलाई निरन्तर गर्न सहयोग गर्नुस्। तपाईँको सानो सहयोग पनि मेरो संसारका लागि ठूलो योगदान हुनेछ। सहयोगका लागि दायाँ छेउमा रहेको पेपाल बटन वा चेकको प्रयोग गर्न सक्नुहुन्छ। चेक पठाउने ठेगानाका लागि मलाई ईमेल गर्नुहोला।

२०६२ माघ १६, आइतबार
अपडेटः शाही चुनाव एउटा ठट्टा बन्न पुगेको छ। प्राप्त पछिल्लो जानकारी अनुसार माघ २६ गते ४ हजार १ सय १६ पदका लागि चुनाव हुनुपर्नेमा आधा अर्थात् २ हजार १ सय ४ स्थान रिक्त छन्। अर्थात् त्यहाँ कसैको उम्मेदवारी परेको छैन। अब त्यहाँ माघ २६ गते निर्वाचन हुँदैन। त्यहाँका लागि छुट्टै निर्वाचन कार्यक्रम बनाइन्छ। यसरी हेर्ने हो भने अरुलाई चुनाव गराउन नसकेको भन्दै असक्षमको पदवी गुल्ट्याएर शासन सत्ता आफ्नो हातमा लिने मन्त्रिपरिषद्का अध्यक्ष आफैले पनि भनेको समयमा चुनाव गराउन नसकेको प्रष्ट भएको छ। २२ वटा नगरपालिकामा अरु उम्मेदवार नभेटिएपछि एक्ला उम्मेदवारलाई निर्विरोध विजयी भएको घोषणा गरिएको छ।

निर्वाचन आयोगले सोमबारदेखि चुनाव प्रचार प्रसार गर्ने वातावरण मिलाउन सरकारलाई भनेको छ। दस दिन बाँकी छ चुनाव, तर धेरैले उम्मेदवारको विषयमा नै थाहा पाएका छैनन्। हेरौं, अब भोलिदेखि कसरी उनीहरु ‘दुलो’ बाट बाहिर निस्केर चुनाव प्रचार गर्न आउने हुन्। स्वतन्त्र समाचार सेवाका अनुसार उम्मेदवारहरु कडा सुरक्षा घेराभित्र लुकीलुकी हिँडिरहेका छन्। स्वससेको समाचार पढ्न भित्र आउनुस्। (more…)

२०६२ माघ १६, आइतबार
बिना कामको व्यस्तताका कारण यो भिडियो ब्लग तयार पार्न त ढिला भयो नै, एडिट गरेर अनलाइनमा राख्न पनि कम्ति झण्झट भएन। यो भिडियो ब्लग हो- माघ १३ गते नेपाल बन्दको दिन नगर निर्वाचनको उम्मेदवारी दर्ता गराउनेहरुको सम्बन्धमा। यसमा मेयरका लागि मनोनयन दर्ता गराउने केही उम्मेदवारहरुसितको कुराकानी, मनोनयन दर्ता गर्न राष्ट्रिय सभागृहमा आएको भीड आदि हेर्न सकिन्छ। यसलाई सीधा हेर्न यहाँ क्लिक गर्नुस्। डाउनलोड गर्नका लागि यहाँ राइट क्लिक गरेर सेभ टार्गेट एज गर्नुस् [24.8 mb, wmv format] युट्युबमा यो भिडियो हेर्न भित्र आउनुस्। (more…)

सरकारले सुरक्षा दिन्छु भनेर भने पनि विश्वास नगरेकाले सात दलको आह्वानमा बिहीबार भएको नेपाल बन्दका क्रममा सिंहदरबारअगाडिको सडक सुनसान भयो।

भिडियो ब्लगमा बढी ध्यान दिन थालेपछि फोटो ब्लगमा कम ध्यान गइरहेको छ। वास्तवमा फोटो ब्लग गर्दा छुट्टै मजा छ। आज त्यही धोको पूरा गर्नका लागि भिडियो ब्लगलाई भोलिसम्मका लागि स्थगित गरेर आजका २१ वटा फोटोहरुका साथ आएको छु। भिडियो ब्लग पनि धेरै छन्- उम्मेदवारको मनोनयन दर्ता गराउनेको भीड, केही मेयर पदका उम्मेदवारहरुको अन्तर्वार्ता, रुबिन गन्धर्वका गीत र चर्का नारा अनि भाषण। भोलिदेखि बिस्तारै त्यसलाई अपलोड गर्न थाल्नेछु। आज भने दिनभर खिचेका फोटोहरुबाट यो फोटो ब्लग। बाँकी (more…)

यस्ता छन् राजाले गराउने चुनावका उम्मेदवार
२०६२ माघ १३, बिहीबार
विहारमा लालूप्रसाद यादवले आफ्नी राजनीतिसम्बन्धी केही सम्बन्ध नभएकी निरक्षर पत्नी राबडीदेवीलाई मुख्यमन्त्री बनाएका थिए। नेपालको काठमाडौं महानगरपालिकाको निर्वाचनमा पनि आज झण्डै त्यस्तै शैलि दोहोरियो। माथिको फोटोमा देखिएकी राधा उपाध्याय हुन्। कामपा वडा नं ८ का वडाअध्यक्ष पदका एक मात्र उम्मेदवार अर्थात् निर्विरोध निर्वाचित वडाअध्यक्ष। उनी एक स्कूलमा कुचो लगाउने, पानी खुवाउने काम गर्दिरहिछिन्। त्यही स्कूलका प्रिन्सिपलले उनलाई उठ्न लगाएको रे। नउठे जागिर खोस्छु भने रे। त्यसैले उठेको रे। अब निर्विरोध हुनुभयो, वडामा के काम गर्नुहुन्छ त भनेर हामी पत्रकारहरुले सोध्दा उनले भनिन्, खै मलाई केही थाहा छैन। पढेको भए पो थाहा नहुनु। नजान्ने मान्छेलाई उठाएर के हुन्छ त ? उनीसित हामी पत्रकारहरुले गरेको कुराकानीको भिडियो हेर्ने भए भित्र आउनु होला। (more…)

राजाले शासन सत्ता आफ्नो हातमा लिएको एक वर्ष पूरा हुने दिन फेब्रुअरी १ तारिखका दिन विश्वका विभिन्न देशमा विरोध प्रदर्शन तथा र्‍यालीको आयोजना हुने भएको छ। यससम्बन्धमा मलाई ईमेलबाट प्राप्त केही जानकारी यहाँ प्रस्तुत गर्दैछु। कृपया अरु केही कार्यक्रम छन् भने जानकारी पठाउन अनुरोध छ। (more…)

निषेधाज्ञा हटाइएपछि हिजो न्युरोडमा भएको तनाव र भिडन्तको भिडियो ब्लग प्रस्तुत गर्ने क्रममा आज तेस्रो तथा अन्तिम अंश प्रस्तुत गर्दैछु। यो अंशमा पानीको फोहोरालाले लागेर एक प्रदर्शनकारी ढलेको दृश्य देख्न सकिन्छ। हिजोको प्रदर्शनका क्रममा दुई जना प्रदर्शनकारी पानीको फोहोराले लागेर बेहोस भएका थिए। हिजोको प्रदर्शनमा जति पानीको फोहोराले प्रहार गरे पनि प्रदर्शनकारीहरु पछि नहटेर झन्-झन् अगाडि बढेको, पछाडि फर्केर पानीको फोहोरा फर्काउने प्रहरीलाई नितम्बतिर इंगित गर्दै जिस्क्याएका दृश्य रमाइला थिए। तर क्यामेरामा जुमको सुविधा नभएकोले ती दृश्य प्रष्ट भने देखिएको छैन। सक्छस् भने गोली ठोक भन्दै छाती थापी उफ्रिएको दृश्य भने तपाईँ देख्नसक्नुहुन्छ। भिडियो हेर्नका लागि भित्र आउनुहोला। (more…)

२०६२ माघ ११, मंगलबार
नामै न- गर भएको निर्वाचन गराउन खोज्ने सरकारको जिद्दी देखेर जिल खाएको म निर्वाचन हुन धेरै दिन बाँकी नहुँदा पनि निर्वाचनको एउटै पर्चा नभेटिँदा छक्क परेको थिएँ। तर आज न्युरोड जाँदा यो पहेँलो पर्चा भेटेँ। तपाईँहरुका लागि मैले यो पर्चाको तस्वीर खिचेर राखेको छु। पर्चा अलि लामो भएकोले भित्र राखेको छु। हेरिसकेपछि प्रतिक्रिया लेख्न नभुल्नु है त। बाँकी (more…)

२०६२ माघ ११, मंगलबार
अपडेटः दोस्रो अंश पनि भित्र अपडेट भइसकेको छ। दोस्रो अंशमा मेरो क्यामेरामा पानीको फोहोरा लाग्दाको दृश्य पनि देखिन्छ।

अपडेटः आजको भिडन्तका E X C L U S I V E दृश्यहरु मध्ये पहिलो अंश भित्र राखिसकेको छु।

आजका मितिदेखि लागू हुने गरी चक्रपथ क्षेत्रभित्रको निषेधाज्ञा हटाइएपछि भएको पहिलो प्रदर्शनका कारण न्युरोड क्षेत्र दिनभर तनावग्रस्त रह्यो। प्रहरीले आज प्रदर्शनकारी र सामान्य बटुवालाई समेत निर्ममतापूर्वक लाठी प्रहार गरेको देखिन्थ्यो भने ३ दमकल पानीको फोहोरा म हुँदासम्म छ्यापिएको थियो। पानीको फोहोरा छ्याप्ने क्रममा प्रहरीले हामी पत्रकारहरु भएको ठाउँमा समेत लक्षित गर्दा मेरो क्यामेरा र जीउ निथ्रुक्कै भयो भने च्यानल नेपालको एउटा क्यामेरा बिग्रियो। जति पानीको फोहोरा छ्याप्दा पनि प्रदर्शनकारीहरु त्यहाँबाट हटेका थिएनन्। यससम्बन्धी केही एक्सक्लुसिभ दृश्यहरु अहिले केही बेरपछि म सार्वजनिक गर्ने तयारीमा छु। कृपया प्रतीक्षा गर्नुहोला।
यसैबीच प्राप्त जानकारी अनुसार काठमाडौंमा मात्र हैन, धरान र पोखरामा पनि प्रिपेड मोबाइल सरकारले बन्द गराएको छ। (more…)

हुनत यो भिडियो ब्लग मैले हिजै राख्ने विचार गरेको थिएँ। तर दिवंगत स्वर किन्नरी तारादेवीले गाए जस्तै “सोचेजस्तो हुन्न जीवन” जलस्रोतको दोस्रो धनी देश भनेर नाक फुलाएर के गर्नु, दिनहुँ लोडसेडिङको मार खेप्नु परेको छ। हिजो भिडियो तयार पार्दै थिएँ, बत्ती गयो। बिहानै बत्ती गएको छ, राति बत्ती गएको छ..! अनि रातभर मेरो वर्ल्डलिङ्कको इन्टरनेट पनि चलेन। हाम्रोतिर बत्ती आउँदा आईएसपीकोमा बत्ती जाने रहेछ। आईएसपीले त विद्युतको वैकल्पिक उपाय गर्नुपर्ने हो नि, त्यो पनि गरेको छैन। यो भिडियो ब्लग न्युरोड-बसन्तपुर क्षेत्रमा माघ ८ गते भएको तनावको हो। यसको पहिलो अंश हेर्नभित्र आउनुहोला। (more…)

२०६२ माघ १०, सोमबार
निरंकुश र स्वेच्छाचारी राजाविरुध्द मेरो संसारको पहलमा झण्डै एक महिना अगाडि भएको गुगलबम्बिङ प्रोजेक्ट सफल भएको छ। अब तपाईँ गुगलमा गएर Autocrat king सर्च गर्नुभयो भने हामीले चाहेकै परिणाम पहिलो नम्बरमा देखिनेछ। यो प्रोजेक्ट सफल पार्न सहयोग गर्नुहुने देशविदेशका सम्पूर्ण लोकतन्त्रवादीहरुलाई बधाई छ। हेर्दा सामान्य लागे पनि यो एउटा सांकेतिक विजय हो निरंकुशताविरुध्द !

अपडेट@9pm NST: मोबाइल सेटमा टावर देखाउँदैमा मोबाइल खुल्यो भनेर मख्ख परेको त के खाएर हुनु नि, मेरो प्रिपेड त अझै खुलेको छैन रहेछ। पोस्टपेडमात्रै खुलेको रहेछ। अब प्रिपेड खोल्न नानाथरिका नाटक गर्ने हुन् कि खुरुक्क खोल्ने हुन्, त्यो भने कथित “विष्णुका अवतार”लाई नै थाहा होला।

अपडेट@8pm NST: दूरसञ्चारको मोबाइल फोन सुचारु भएको छ। निजी क्षेत्रको मेरो मोबाइल र युटिएल भने अहिलेसम्म सुचारु भएको छैन।

२०६२ माघ १० सोमबार @ 7 pm NST
थानकोटमा माअ‍ोवादीहरुले आक्रमण गरेपछि माघ ३ गतेदेखि चक‌्रपथभित्र लगाइएको कर्फ्यु र शान्तिपूर्ण सभा र जुलुसमाथि लाग्दै आएको प्रतिबन्ध निषेधाज्ञा आज सोमबारदेखि हटाइएको छ। काठमाडौं र ललितपुरका प्रजिअहरुले यससम्बन्धी सूचना जारी गरेका हुन्। रत्नपार्कजस्ता प्रमुख स्थानहरुमा लाग्दै आएको निषेधाज्ञा भने कायमै छ। त्यसैगरी गिरफ्तार कयौं नेता, कार्यकर्ता र मानवअधिकारवादीहरु पनि थुनामा नै छन्। मोबाइल र वायरलेस टेलिफोन पनि खोलिएको छैन।

(EXCLUSIVE Video Footage inside)
२०६२ माघ ८, शनिबार
ती बिचरा लोकतान्त्रिक स्रष्टाहरुले के त्यस्तो अपराध गरेका थिए र उनीहरुलाई त्यसरी दमन गर्दै गिरफ्तार गर्नुपर्थ्यो ? उनीहरु कवितामात्रै त भन्दै थिए। त्यहाँ केही उग्र प्रहरीहरुले स्रष्टाहरुमात्रै हैन, पत्रकारहरुलाई पनि दुर्व्यवहार गरे। पत्रकार टंक पन्त र प्रकाश सिलवाललाई भ्यानमा कोचे। साथी मणिले समेत एक लाठी खाएछ। देउडा गायक नन्दकृष्ण जोशी “हामी तपाईँहरु कै लागि संघर्ष गरिरहेका छौं” भनी प्रहरीलाई सम्झाउँदै थिए। कठालो समातेर भ्यानतिर तानिँदै गर्दा लोकतन्त्रवादी कवि अर्जुन पराजुली कराउँदै थिए- कुनै घरको भित्तो फोरिएन, कुनै बैंक लुटिएन, कुनै मूर्ति चोरिएन…स्रष्टाहरुमाथि लाठीसमेत बर्साइयो। भिडियो ब्लग हेर्न भित्र आउनुहोला। (more…)

(EXCLUSIVE Video Footage inside)
२०६२ माघ ८, शनिबार
अपडेटः सात दलले माघ १३ गते नेपाल बन्दको अ‍ौपचारिक घोषणा गरेका छन्। आज कर्फ्यु एक घण्टा घटाएर राति १० बजेदेखि गरिएको छ।
हिजोको शान्तिपूर्ण प्रदर्शनदेखि डराएर कर्फ्यु लगाउने निरंकुश सरकारले आज जनताको शक्ति देखिरहेको छ। काठमाडौं अकल्पनीय रुपमा तनावग्रस्त छ- विशेष गरी सात दलले सभा गर्ने भनेको स्थल बसन्तपुर र त्यस वरपर। बसन्तपुरलाई सेना, सशस्त्र र जनपद प्रहरीको संयुक्त टोली लागेर नियन्त्रण गर्न खोज्दा पनि असफल भइरहेको छ। त्यसैगरी न्युरोड, इन्द्रचोक, खिचापोखरी क्षेत्रहरु पनि तनावग्रस्त छन्। बसन्तपुरमा सयौं अश्रुग्यास प्रहार गर्दा पनि नियन्त्रणमा लिन सकिएको छैन। बसन्तपुरको अश्रुग्यासले जीवित देवी कुमारीको आँखामा पनि आँसु बगेको हुनुपर्छ। हामी पत्रकार लगायत सर्वसाधारणलाई त्यता जान दिइएको छैन। ठाउँठाउँमा प्रहरी-प्रदर्शनकारी भिडन्त भइरहेको छ। ६० कटिसकेका वृध्दाहरु सडकमा गणतन्त्रका नारा लगाउँदैछन्। मानवअधिकारवादी र पत्रकारहरुलाई पनि चुटिएको छ। त्यसको विरोधमा पत्रकार र मानवअधिकारवादीहरुले प्रहरीलाई घेरिरहेका छन्। टायर बालिएका छन्। ढुंगा हानेर प्रहरीलाई टाढाटाढासम्म खेदिएका छन्। म आफ्नो क्यामेराको मेमोरी कार्ड सकिएर मात्रै घर फर्केको हुँ। अझै पनि त्यहाँको स्थिति तनावपूर्ण नै छ। संयुक्त सुरक्षाफौजलाई त्यहाँको स्थिति नियन्त्रणमा लिन धौधौ भइरहेको छ। यससम्बन्धी केही EXCLUSIVE VIDEO FOOTAGE हरु राखेर म फेरि त्यहाँ जाने विचारमा छु। भिडियो हेर्न भित्र आउनुहोला। (more…)

माघ ७ गते दिनभर लगाइएको कर्फ्युका कारण भएको मूर्दा शान्तिका बारेमा भिडियो ब्लगहरु यहाँभित्र राखिएका छन्। यससम्बन्धी कम्तिमा ३ वटा ब्लग यहाँ राख्ने योजना भए पनि अहिलेलाई 2 वटा मात्रै राखिएको छ। यो दोस्रो भिडियो ब्लगमा प्रहरीले कर्फ्युका बेला बाहिर निस्केकाहरु माथि कस्तो किसिमको कडा व्यवहार गरेका थिए, त्यो हेर्न सकिन्छ। बाँकी केही घण्टापछि थपिने छन्। पहिलो र दोस्रो भिडियो हेर्न भित्र आउनुहोला। बाँकी (more…)

बसन्तपुरको यसै स्थानमा शनिबार सभा हुँदैछ। यो फोटो भने शुक्रबार कर्फ्यु लाग्नु १५ मिनेट अगाडि खिचिएको हो। अरु फोटोका लागि भित्र आउनुहोला।

सात राजनीतिक दलले शनिवार राजधानीमा विशाल जुलुस र २ बजे बसन्तपुरमा सभा गर्ने भएका छन्। शुक्रबार गर्ने भनिएको प्रदर्शन सरकारले लागू गरेको कर्फ्युका कारण प्रभावित भएकाले शनिवारलाई सारिएको हो। शनिबार पनि कर्फ्यु लागू गरिन्छ कि धरपकड मात्रै हुन्छ, त्यो भने थाहा भएको छैन। शुक्रबार रातिसम्म शनिबार बिहान ४ बजेसम्म मात्र कर्फ्यु लाग्ने बताइएको छ। (more…)

भिडियो हेर्नका लागि तलको प्लेयरमा क्लिक गर्नुहोला। टिप्सः यदि तपाईँको इन्टरनेट कनेक्सन स्लो छ भने पहिला बायाँ छेउको पज बटन थिचेर एक छिन पछि पुनः सोही बटन थिचेर हेर्नुभएमा आरामसित हेर्न सकिन्छ।

…त्यहाँ भेटिएका एक विद्यार्थी नेताले पाटनको कृष्ण मन्दिरमा ४ बजे कार्यक्रम छ रे भनेर सुनायो। त्यति जानकारी हामीलाई पर्याप्त थियो। तर जुलुस निस्कन्छ नै भन्ने ग्यारेण्टी भने थिएन। किनभने गगन थापा, रामकुमारी झाँक्री जस्ता सशक्त विद्यर्थी नेताहरु गिरफ्तार भइसकेका थिए। अनि अरु विद्यार्थी नेताहरु पनि भूमिगत भइसकेका थिए। चार घण्टामात्र सुतेको हुनाले एक त निद्रा नपुगेको, त्यसमाथि हिँडेर त्यत्रो बाटो जाँदा थाकेर लखतरान भइसकेको थिएँ म। अलि परतिर अरु विद्यार्थीहरु पनि भेटिए। यहाँ पनि अनेरास्ववियु कै आकस्मिक कार्यक्रम रहेछ। गिरफ्तारी नदिनू भन्ने निर्देशन रहेछ, त्यसैले बचेर छापामार शैलिमा कार्यक्रम गर्न लागेका रहेछन्। क्युरियो सामान बेच्ने स्थानमा उभिरहेका एक विद्यार्थी नेताले हामीलाई “सामान किन्न आउनु भएको हो ?” भनेर भने। बिस्तारै-बिस्तारै त्यहाँ विद्यार्थीहरु जम्मा भइरहेका थिए। तर सबै विद्यार्थी एकै ठाउँमा हैन, छुट्टाछुट्टै छरिएर बसेका थिए। इशाराबाट कुरा भइरहेको थियो। भिडियो खिच्दाको अनुभव पढ्न भित्र आउनुहोला। (more…)

२०६२ माघ ७, शुक्रबार

आउनुस्, हामी सबै मिलेर शाही सरकारलाई बधाई दिउँ। आखिर उसले बल प्रयोग गरेरै भए पनि आजको शान्तिपूर्ण सभालाई असफल पारेरै छाड्यो। मोबाइल बन्द अनि कर्फ्युका कारण घरमा बन्दी अवस्थामा मात्र हैन, आज दिनभर विद्युत आपूर्ति पनि बन्द गरेर हामीलाई कम मानसिक यातना दिइएन। विद्युत प्राधिकरणमा सोध्दा सुरक्षाकर्मीहरुले कर्फ्युमा निस्कने अनुमति नदिएको बताए। केही भिडियो ब्लगहरु खिचेको छु, त्यसलाई अहिले म अपडेट गर्ने प्रयास गर्नेछु।

उपत्यका प्रवेशमा निकै कडाइ

२०६२ माघ ७ शुक्रबार @ 1218 am NST

सात दलको माघ ७ को सभाको प्रचारका लागि टाँसिएका पोस्टर च्यातच्युत पारिए पनि भोट खसाउन जाउँ भन्ने पोस्टर भने जस्ताको तस्तै। अझै पनि चुनाव होला त ? फोटोः उमेश
सरकारले राजधानीमा शुक्रबार हुने भनिएको सात दलको प्रदर्शनमा ठूलो संख्यामा उपत्यका बाहिरका नेता तथा कार्यकर्ता र सर्वसाधारण आउने ठानेर थुनछेक गरिरहेको छ।

उपत्यका छिर्ने प्रवेश नाकामा ठूलो संख्यामा सुरक्षाकर्मीहरु तैनाथ गरी राजधानी छिर्न कडाई गरिएको छ । उपत्यकाको नाकाहरुमा रहेका शाही नेपाली सेनाको गुल्म र चेकपोष्टमा रहेका युनिफाइड कमाण्डका सुरक्षाकर्मी परिचालन गरी चक्रपथ बाहिरका नागरिकलाई समेत चक्रपथभित्र प्रवेशमा कडाइ गरेको छ जसले गर्दा चक्रपथभित्र अर्कै राज्य भएको जस्तो महसूस हुन थालेको छ। बाँकी (more…)

२०६२ माघ ६, बिहीबार @ 915 pm NST
भर्खरै नेपाल टेलिभिजनमा दिइएको सूचना अनुसार माघ ७ गते बिहान ८ बजेदेखि साँझ ६ बजेसम्म कर्फ्यु घोषणा गरेर निरंकुश सरकारले शान्तिपूर्ण सभालाई बिथोल्न चरम कायरता प्रदर्शन गरेको छ। अब भोलि शुक्रबारको दिन रक्तपात चाहिँ नहोस्, यही कामना गर्नुपर्छ। कर्फ्यु चक्रपथभित्र घोषणा गरिएको हो। यसैबीच अपुष्ट समाचार अनुसार सात दलले ८, ९ र १० गते तीन दिन बन्दको घोषणा गरेका छन्। यसैगरी भोलि दिल्लीमा लोकतन्त्रको पक्षमा प्रदर्शन हुने भएको छ।

कृपया भिडियो ब्लग सुचारु गर्न सहयोग गर्नुहोस्।
निषेधाज्ञा लागू भएको दिन थियो अर्थात् माघ ४ गते। बिहानैदेखि निषेधाज्ञा ठाउँठाउँमा तोडिने क्रम जारी थियो र साथी मणी दाहालसँगै म निस्किएको थिएँ स्थिति बुझ्न। कान्तिपुर टेलिभिजनका दीपक भट्टराईले साढे दुई बजे नयाँ बानेश्वरमा कार्यक्रम छ भनेकोले त्यतैतर्फ लाग्यौं। हामी त्यहाँ पुग्दा आयोजकहरु भन्दा पनि पत्रकारहरुको भीड बढी थियो। साथी खिलाले हाँडीगाउँबाट नरहरि आचार्यहरुले गिरफ्तारी दिँदैछन् भन्ने सूचना दिए। तर तत्काल त्यहाँ पुग्न संभव थिएन। एकैछिन पछि त्यहाँ मोटरसाइकल र्‍याली निकाल्ने प्रयास हुँदाहुँदै गिरफ्तार गर्ने क्रम सुरु भइहाल्यो। यससम्बन्धी भिडियो ब्लग मैले यहाँ गरिसकेको छु। र्‍याली निकाल्नै नदिई गिरफ्तारी गरिएको थियो तर पुनः र्‍याली निकाल्ने कुरा थियो। एक जना कार्यकर्ताले हामीलाई सुटुक्क रत्नराज्य स्कूलबाट निस्कँदैछ भन्ने खबर दियो। त्यहाँ पुग्दा भने केही देखिएन। अनि बाध्य भएर हामी असनतर्फ लाग्यौं। त्यहाँ अर्को आकस्मिक रुपमा घोषणा गरिएको कार्यक्रम रहेछ। (more…)

चोकचोक र गल्लीगल्लीमा शाही नेपाली सेना र सुरक्षाकर्मीहरुको बाक्लो उपस्थितिका बीच राजधानीमा बिहीबार बिहानैदेखि प्रदर्शनहरु भइरहेका छन । विभिन्न चोक, गल्लीहरु र क्याम्पसहरुमा प्रदर्शन जारी रहेको छ । सुरक्षाकर्मीको आँखा छल्दै प्रदर्शन भइरहेको जानकारी प्राप्त भएको छ । (more…)

२०६२ माघ ६ बिहीबार
सरकारले बिहीबार बिहानैदेखि राजनीतिक दलका नेता, कार्यकर्ता एवं नागरिक अधिकारकर्मीहरुलाई व्यापक घरपकड गरेको छ । राजनीतिक दलका केन्द्रीय नेतालगायत दर्ुइ सय भन्दा बढीलाई गिरफ्तार गरिसकिएको बुझिएको छ । पक्राउ परेकाहरुलाई सशस्त्र प्रहरी मुख्यालय हल्चोक, २ नम्बर सशस्त्र प्रहरी गण महाराजगंज र राष्ट्रिय प्रहरी प्रशिक्षण प्रतिष्ठान महाराजगंजमा राखिएको छ ।

एमाले नेता प्रदीप नेपाललाई दिइएको पूर्जी। फोटो साभारः नेपाल इन्फो
बाँकी पढ्न भित्र आउनुस्। (more…)