ल है मेरो पनि ब्लगिंग सुरु भयो
२०६१ चैत २३, मंगलबार
काठमाडौं,
आजबाट मैले पनि ब्लगिंग थालेँ । धेरै दिन भयो मैले ब्लगिंगका बारेमा नेटमा रिसर्च गर्न थालेको । त्यसो त यो शब्द मैले धेरै अगाडि नै सुनेको थिएँ र त्यतिबेला नै यसबारेमा एउटा आर्टिकल लेखुँला भन्ने ठानेको थिएँ । त्यतिबेला त म पनि शनिबारको स्पेसटाइमको विशेषांकमा नियमित लेखक बनेको थिएँ नि । पछि पो आर्टिकल लेखेवापत पारिश्रमिक दिन छाडेकोले लेख्न छाडेको । तर त्यतिबेला त्यति उत्सुक भइनँ किन हो कुन्नि । अहिले विशेषतः माघ १९ को शाही कदमपछि मूलधारका सञ्चारमाध्यममा कडा सेन्सरसिप लागू हुँदा ब्लगिंग नै सूचनाको मूख्य स्रोत बन्न पुगेको छ । म विशेषगरी आकर्षित भएको चाहिँ कान्तिपुरका पत्रकारहरुको ब्लग साइटबाट हो । त्यसो त अरु पनि ब्लग साइट छन् । तर सबैभन्दा मेहनत चाहिँ नियमित रुपमा यसैले गरिरहेको छ । अन्तराष्ट्रिय चर्चा पनि यी दुवै साइटले निकै पाएका छन् ।
मैले नेटमा रिसर्च गर्दा नेपाली भाषामा भने ब्लग देखिनँ । त्यसैले मैले यो जमर्को गरेको हुँ । शायद यो पहिलो नेपाली ब्लग हुनसक्छ । हिन्दी भाषामा भने रहेछ ब्लग । हिन्दीमा यसलाइ चिठ्ठा भनिंदो रहेछ ।
यस ब्लगमा म र मेरो संसारका बारेमा कुरा हुनेछ । उनीहरुकोमा जस्तो समाचारप्रधान हुनेछैन । तर मलाइ असर पार्ने समाचार अनि तपाइँलाइ रमाइला लाग्न सक्ने समाचार यसमा हुनेछन् । मैल नेटमा रिसर्च गरेर फेला पारेका साइटका लिंकहरु पनि यसमा तपाइँ भेट्टाउन सक्नुहुनेछ ।
भाषा नेपाली छानेपनि अक्षर अथवा फन्टको समस्या हुनेरहेछ । प्रोगामिंग त सजिलो वर्डप्रेसको भेटियो । फन्टका लागि चाहिँ युनिकोड प्रयोग गर्ने निधो गरेँ । हिन्दी ब्लगहरु पनि युनिकोड फन्टमा नै हुनेरहेछ । तर बानी नभएकोले युनिकोडमा टाइप गर्न अलि अप्ठ्यारो हुनेरहेछ । अझ अर्को समस्या त के भने अफिसमा विन्डोज ९८ अपरेटिंग सिस्टम छ । त्यसमा युनिकोड फन्टमा टाइप गर्नै मिल्दैन । फेरि युनिकोड फन्टका म्याटर त इमेलबाट ब्लगमा हाल्न नमिल्ने रहेछ । यसरी समस्या त छन्, तर हेरुँ के हुनेछ अनुभव ।
Hami Bidesh ma vayeka Nepalese ko lagi yo merosansar le naya news khurak haru diyeko chha, hami bidesh ma baseka nepal haru ati khusi chhau. I Love you merosansar.
Sappan k.c.
Paris
Comment by Sappan K.c.(Europe) — August 9, 2005 @ 2:20 am