साँच्चिकै देशमा केही परिवर्तन हुँदैछ ?
२०६२ जेठ ३ मंगलबार
अहिले नेपालमा केही परिवर्तन हुन लागेको हल्ला व्यापक छ । के परिवर्तन हुने हो, कहिले हुने हो भन्ने बारेमा भने कसैले यकिन गर्न सकेका छैनन् । तर सबै भन्छन् केही त हुन लागेको पक्कै हो । बाँकी
देशमा कुनै ठूलो काम गर्नुअघि राजाले कुनै एउटा प्रख्यात मन्दिरमा पूजा गर्ने चलन जस्तै चलिआएको छ । माघ १९ को कदम चाल्नुअघि पनि राजाले खोटाङ हलेसी सवारी भई पूजा गरेका थिए । असोज १८ को कदमअघि पनि राजाले गोरखाको गोरखकाली मन्दिर सवारी भई पूजा गरेका थिए ।
यसै सन्दर्भमा हिजो राजा सपरिवार दक्षिणकाली सवारी भई पूजाअर्चना गरेका थिए । संयोगवश यति नै बेला देशमा राजनीतिक परिवर्तन हुने हल्ला पनि चलिरहेको छ । हल्लामा विश्वास गर्ने हो भने राजाले प्रधानमन्त्री नियुक्त गरी राजनीतिक परिवर्तन गर्नेछन् । पूर्व प्रधानमन्त्री तथा म्यानपावर पार्टी (क्षमा गर्नुस् मैले अंग्रेजीमा उल्था गर्न पुगेछु, पार्टीको नाम जनशक्ति पार्टी हो) का अध्यक्ष सूर्यबहादुर थापाले यो हल्ला चर्काउन मध्दत गरेका छन् । तर आज रिपोर्टस क्लबमा भएको ज्योतिषहरुसितको अन्तर्क्रियामा भने थापा, चन्द, कोइराला, नेपाल, देउवा आदि कोही पनि प्रधानमन्त्री बन्ने योग नदेखिएको दाबी गरियो । एक ज्योतिषले साउनभित्र राजनीतिक परिवर्तन भएर शान्तिको पहल नभए देशमा ठूलै अनिष्ट हुनसक्ने दाबी पनि गरे । राजाले पूजनीय भएर बसेमा राजतन्त्रका लागि राम्रो हुने उनीहरुको ठहर थियो । नेपालको राशी र राजधानी काठमाडौंको राशी नमिल्ने भएकाले यहाँ बसेर तयार पारिएका योजना सफल हुन नसकेको उनीहरुको दाबी थियो । अनि यसको समाधान के त ? उनीहरुका अनुसार राजधानी अन्यत्रै सार्नु पर्छ वा राजधानीभित्र अर्कै जिल्ला बनाई त्यसलाई राजधानी घोषणा गरिनुपर्छ ।
