दूतावासमा दासता
२०६२ जेठ ८ आइतबार
नेपालीहरु नेपालमा बस्न नसकेर विदेशमा पलायन भएको कुरा त अब नौलो रहेन । तर विदेशमा, त्यो पनि फ्रान्स जस्तो विकसित देशमा रहेका नेपाली पनि त्यहाँ बस्न नसकेर विदेशमा शरण लिन पुगे भन्ने कुरा सुन्दा अलि अनौठो लाग्नु स्वभाविक हो । बाँकी
फ्रान्सको शाही नेपाली राजदूतावासमा कार्यरत एक नेपाली कर्मचारी हालै त्यहाँ बसेर काम गर्न नसकी बेल्जियम भागेका छन् । उनका अनुसार आफूलाई दास सरह काममा लगाएको र नेपालमा जति पनि तलब नदिएका कारण भाग्न बाध्य हुनुपरेको हो । ठूल्ठूला हाकिमहरुले भने लाखौं पाउने आफूले भने तलब समेत नपाउने भनी उनले आक्रोश पोखेका छन् ।
फ्रान्सको उक्त राजदूतावासमा राजदूतको पद खाली भएको डेढ वर्ष जति भइसकेको छ । हाल त्यहाँ शाही नेपाली सेनाका पूर्व प्रधानसेनापति प्रज्ज्वल शमशेर राणालाई राजदूतका रुपमा पठाउने तयारी भइरहेको छ । नेपालले उहाँको नाम प्रस्तावित पनि गरिसकेको छ । तर फ्रान्सले भने यसलाई स्वीकार गरिसकेको छैन । उहाँको कार्यकालमा सेनाबाट सबैभन्दा बढी मानवाधिकार हनन् भएको मुद्दा अन्तराष्ट्रिय रुपमा उठिरहेको बेला फ्रान्सजस्तो मानवाधिकारका लागि सचेत मुलुकले उहाँको नाममा स्वीकृति जनाउनेमा शंका उठिरहेको छ ।
