के होला राजाको आजको सम्बोधनमा ?
२०६२ जेठ १३ शुक्रबार
काठमाडौंभर चर्को हल्ला फैलिएको छ कि आज राजाको विशेष सम्बोधन हुँदैछ । हिजैदेखि फैलिएको हल्ला हो यो । सुनिएको हल्ला अनुसार राजाले सोल्टी होटलबाट सम्बोधन गर्दैछन् रे । कार्यक्रम चाहिँ त्रिभुवन विश्वविद्यालयबाट राजाको अभिनन्दन समारोह रे । त्रिभुवन विश्वविद्यालयले राजालाई अभिनन्दन गर्ने बारे त्रिविविका नै प्राध्यापकहरुलाई थाहा रहेनछ । अकस्मात् बनेको कार्यक्रममा अकस्मात् सम्बोधन हुने तय भएकोले सम्बोधन माघ १९ को जस्तै महत्त्वपूर्ण हुनेछ रे ।
नेपालको राजनीतिमा शुक्रबार धेरै उथलपुथलका घटना भएका छन् । आज पनि शुक्रबार नै हो । त्यसो त यी शब्द टाइप भइरहँदा अहिले मध्यरात नै छ । तर पनि शुक्रबार लागिसकेको छ ।
आजै आन्दोलनरत सात दलले सात अलग ठाउँबाट जुलुस निकाली नयाँ बानेश्वरमा साढे २ बजे आमसभा गर्ने भएका छन् । आमसभामा दलका मुख्य नेताहरुले सम्बोधन गर्दैछन् । यही आन्दोलनलाई ध्यानमा राखेर पनि राजाको सम्बोधन आउन लागेको रे भन्ने हल्ला छ ।
यसरी हेर्दा आजको दिन नेपालको इतिहासमा उल्लेख हुने गरी महत्त्वपूर्ण हुने देखिएको छ । कुनै महत्त्वपूर्ण कुरा भएमा भोलि सकेसम्म छिटो अपडेट गर्ने नै छु । तर यदि माघ १९ मा जस्तै टेलिफोन र इन्टरनेट काटियो भने चाहिँ लामो समयसम्म तपाईँ र हाम्रो भेट असंभव हुनेछ ।
