कम्तीमा ५३ को मृत्यु, मर्नेको संख्या अझै बढ्नसक्ने
२०६२ जेठ २३, सोमबार
भर्खरै प्राप्त समाचार अनुसार चितवनको बगईबाट सदरमुकाम भरतपुरतर्फ जाँदै गरेको एक यात्रुवाहक बस आज बिहान एम्बुसमा पर्दा कम्तीमा २० जनाको मृत्यु भएको छ । मृत्यु हुनेहरुको संख्या अझै बढ्नसक्ने अनुमान गरिएको छ । बसमा १ सय १० जना जति यात्रु भएको बताइएको छ । उनीहरुमध्ये धेरै घाइते भएको बताइएको छ । घाइतेमध्ये केहीको अवस्था चिन्ताजनक भएको बताइएको छ ।
अपडेट रोयटर्सको रिपोर्ट अनुसार कम्तीमा २५ जना मारिएको हुनसक्ने जानकारी सेनाका एक अधिकारीले दिएका छन् । उनका अनुसार बस चितवनको मादी गाउँमा थापिएको विद्युतीय धरापमा परेको हो । त्यो गाउँ माअोवादीहरुको प्रभाव क्षेत्र हो रे । रिपोर्टमा एक अर्का सैनिक अधिकारीलाई उद्धृत गर्दै भनिएको छ, शव क्षतविक्षत भएकाले कति जनाको मृत्यु भयो भनी गन्न गार्हो भइरहेको छ ।
अपडेट साँझ ४ बजेः प्राप्त पछिल्लो जानकारी अनुसार घटनामा ५३ जनाको मृत्यु भएको छ भने ४० जना घाइते भएका छन् । माअोवादी द्वन्द्व सुरु भएयता एउटै घटनामा यतिधेरै सर्वसाधारणको ज्यान गएको यो पहिलो घटना हो ।
अन्तिम अपडेटः मृतकको संख्या रेडियो नेपालले ५३ भनेर भनेको भए पनि अब घटाएर कम्तीमा ३८ भनिएको छ । थाहा छैन कसरी यो संख्यामा गडबडी भएको हो । मर्नेहरुमा ३ जना सुरक्षाकर्मी पनि रहेको बताइएको छ । निजी टेलिभिजन इमेज मेट्रोमा घटनाका ज्यादै भयावह दृश्य देखाइएका थिए । शवहरु क्षत विक्षत थिए । बालबालिका पनि भयावह ढंगले मरेका थिए । सार्है डरलाग्दो थियो त्यसमा देखाइएका दृश्य । सार्वजनिक प्रसारण माध्यमले त्यस्तो दृश्य प्रसारण गर्न हुन्थ्यो कि हुन्थेन त्यो छुट्टै विवादको विषय हो । तर घटना साँच्चिकै निन्दनीय हो । इमेजमा देखाइएका केही भयावह दृश्यका तस्वीर हेर्न भित्र आउनुहोला ।
