[ यो समाचार न्युयोर्कबाट मेरो संसारका लागि प्राप्त भएको हो]
राजाको न्युयोर्क आगमन जति जति नजिकै जाँदै छ त्यति त्यति नै न्युयोर्क तथा डीसीमा बस्ने राजावादीलाई मान्छेहरु कसरी स्वागतका लागि भेला गर्ने भनेर हम्मेहम्मे भएको छ। त्यतिमात्र हैन, राजाको स्वागतका लागि भनेर १ सय ५२ सदस्यीय टोली गठन गर्ने भनेर कस्सिएकाहरुले ५० को संख्यामा पनि नाम पुर्‍याउन सकेका छैनन्। बाँकी (more…)

२०६२ भदौ १४ मंगलबार @ 1206 am NST
सरकारी सञ्चारमाध्यम राससबाट प्राप्त आज प्रसारित राजाको अन्तर्वार्ताको पूर्ण विवरण हेर्ने भए भित्र आउनु होला। [सावधानः यो अन्तर्वार्तामा चाहिने कुरा भन्दा नचाहिने कुरा बढी छन्। चाहिने कुरा खोजेर पढ्न सक्नु तपाईँको खुबी हो। पढ्दापढ्दै निद्रा लाग्न पनि सक्छ। अनि झन्डै साढे १७ हजार क्यारेक्टरको यो अन्तर्वार्तालाई युनिकोडमा परिणत गर्दा हुने गल्तीहरु सच्याउन थाल्यो भने त बिहान हुन्छ। त्यसैले जस्ताको तस्तै राखिदिएको छु। सच्याएर पढ्नु होला] बाँकी (more…)

चार कुरामा स्पष्ट भए राजा दलसित वार्ता गर्न तयार

* राजा-दल झगडा जोइपोइको ठाकठुक जस्तोः राजा
* वर्तमान मन्त्रीहरुलाई हटाउने संकेत
* केही सुधार गर्नुपरे राजसंस्था पछि नहट्ने
* माअ‍ोवादी समस्या उत्पन्न हुनुमा दलहरु नै जिम्मेवार
* प्रेसलाई अनुशासित बन्न सर्तक

२०६२ भदौ १३ सोमबार @ 2015 NST
आज दिनभर काठमाडौंमा चर्चाको विषय बनेको साँझ हुने भनिएको राजाको सम्बोधन अहिले भर्खरै सकिएको छ। चर्चा भए जस्तो यो सम्बोधन नभएर हालैको राजाको भ्रमण दलमा संलग्न सरकारी सञ्चारकर्मीहरुलाई दिइएको अन्तर्वार्ता रहेछ।
अन्तर्वार्तामा राजाको बोली, हात हल्लाइ-हल्लाइ कुरा गर्ने शैली हेर्दा राजा हैन, कुनै नेता जस्तो देखिन्थ्यो। हुन पनि पहिलेका राजाको यस्तो अन्तर्वार्ता हेर्ने मौका मैले पाएको थिइनँ।
राजाले अन्तर्वार्ताका क्रममा राजनीतिक दल र राजाबीचको हालको झगडा जोइपोइको ठाकठुक जस्तो भएको बताए। जोइपोइको झगडा हुँदा यस्तो दे भन्ने अनि नदिने, दिउँला पछि, हैन, मलाई आजै चाहियो भने जस्तो हो रे अहिलेको विवाद। जति नजिक भयो यस्ता कुरा भइहाल्छ रे। तीन- चार कुरामा स्पष्ट भए दलहरुसित वार्ता गर्न आफू सँधै तयार भएको राजाले बताए। (more…)

….तर गिरिजाले निर्णय उल्ट्याउन सक्ने

२०६२ भदौ १३ सोमबार
नेपाली काँग्रेसको हाल जारी केन्द्रीय कमिटीको बैठकले अहिले केही बेरअघि आफ्नो विधानबाट संवैधानिक राजतन्त्र शब्दलाई हटाउने अ‍ौपचारिक निर्णय गरेको छ। नेपालको राजनीतिमा काँग्रेसको यो निर्णयलाई निकै महत्त्वका साथ हेरिएको छ। काँग्रस स्थापना कालदेखि नै संवैधानिक राजतन्त्रको पक्षपाती रहँदै आएको थियो। प्रथम जननिर्वाचित वीपी कोइरालाको सरकारलाई राजा महेन्द्रले कू गर्दा पनि काँग्रेस राजतन्त्रको विरुध्दमा खनिएको थिएन।
काँग्रेसले हिजोदेखि बसेको केन्द्रीय कमिटीको बैठकमा यससम्बन्धी छलफल गर्न थालेको हो। बैठकमा अधिकांशले रामचन्द्र पौडेलद्वारा प्रस्तुत विधानबाट राजतन्त्र शब्द हटाउने प्रस्तावको समर्थन गरेका भए पनि शैलजा आचार्य र गिरिजा निकटका नेताहरुले यसको विरोध गरेका थिए। हिजो कुनै सहमतिमा पुग्न नसकेको बैठक आज बिहान पनि सहमतिमा पुग्न नसकेपछि एक पटक स्थगित भएको थियो र पुनः बसेको बैठकले यस्तो निर्णय गरेको हो। शैलजा आचार्यले निर्णयको विरोधमा नोट अफ डिसेन्ट लेख्दै बैठक बहिस्कार गरेकी छन्।
बैठकले गरेको निर्णयलाई पार्टी सभापति गिरिजाप्रसाद कोइरालाले उल्ट्याउन पाउने छन्। यसो गर्न पाउने गरी निर्णय गरिएको सूत्रहरुले बताएका छन्। यी पंक्ति लेख्दासम्म बैठक जारी छ। अहिले बैठकले राजतन्त्रको ठाउँमा उपयुक्त शब्द राख्नका लागि शब्दको खोजी भइरहेको बताइएको छ। सेरेमोनियल मोनार्कीलाई काँग्रेसले स्वीकार्ने संभावना बताइएको छ। महाधिवेशनबाट पारित भए पछि मात्र संवैधानिक राजतन्त्र हटाउने निर्णय कार्यान्वयन हुनेछ। (1230pm NST)

गिरिजाको बोली अकस्मात् फेरिन थाल्यो भन्ने चर्चा सहरमा चल्न थालेकोले होला आज आयोजित एक कार्यक्रममा उहाँले अलि फरक भाषा प्रयोग गर्नुभयो, प्रजातन्त्रका लागि म कसैसँग सम्झौता गर्दिनँ। उहाँले थप्नुभयो, विश्वास गर्नुस्, यो उमेरमा मसित कुनै लोभ लालच बाँकी छैन। पूर्ण प्रजातन्त्र भनेको गणतन्त्रको बोर्डरलाइन हो भन्दै उहाँले अहिलेको परिस्थिति निर्माण हुनुमा राजा नै जिम्मेवार भएको आरोप पनि लगाउनु भयो। प्रतिनिधिसभा पुनर्स्थापनाको संकेत आएकोले आन्दोलन शिथिल र बोली नरम बनाएको आरोप उहाँमाथि लाग्दै आएको थियो। यसअघिको कार्यक्रममा उहाँले लोकतन्त्र र गणतन्त्र मलाई थाहा छैन भन्नुभएको थियो। बाँकी (more…)

हतियार चलाउने प्रशिक्षण लिइरहेका माअ‍ोवादी लडाकूहरु।

जुमा प्रेसको जुमा रिपोर्टाजले नेपालको माअ‍ोवादी विद्रोहलाई केन्द्रित गरी एउटा फोटो फिचर प्रकाशित गरेको छ। जुमाका फोटोग्राफरहरु कास ग्याब्रियल टोर्सेलो र पिट प्याटिसनले माअ‍ोवादी प्रभावित ठाउँहरुमा गई यी तस्वीर खिचेका हुन्। बाँकी (more…)

राजाको हालको भ्रमण र आन्दोलनको तुलना गरिएको भिडियो ब्लग। यसलाई डाउनलोड गर्न यहाँ क्लिक गर्नुहोला। डाउनलोड गर्ने लिङ्कमा क्लिक गर्दा तपाईँले ४५ सेकेण्ड पर्खनु पर्ने हुन्छ। त्यसपछि मेगाअपलोडको लोगोनजिकैको दायाँ छेउको Click here to download मा क्लिक गरी फाइल डाउनलोड गर्नुपर्छ। कुनै समस्या परेमा वा सुझाव सल्लाह दिनका लागि प्रतिक्रियामा लेख्नुहोला।

२०६२ भदौ १० शुक्रबार

संवैधानिक राजतन्त्र लेखिएको सिनो कन्टेनरबाट बोकेर नेपाली काँग्रेसका सभापति गिरिजाप्रसाद कोइरालाले बोकेर लाँदै गरेको कार्टुन चित्र प्रकाशित गरेकोमा कान्तिपुर र दि काठमाण्डु पोस्ट दैनिकलाई कारबाही गर्न सरकारले गम्भीर गृहकार्य गरिरहेको जानकारी सरकारका माइक टंक ढकालले दिनुभएको छ। (more…)

राजाबाट आन्दोलनरत विद्यार्थीहरुलाई प्रश्न
२०६२ भदौ ९ बिहीबार
[राजाको बोली डाउनलोड गरेर सुन्न यहाँ क्लिक गर्नुस्। ]
राजधानीमा पेट्रोलियम पदार्थको मूल्यवृध्दि गरेपछि दिनहुँजसो भइरहेका विद्यार्थी प्रदर्शनहरुलाई लिएर राजाले मुख खोलेका छन्। राजाले यस्तो कामलाई अशोभनीयको संज्ञा दिँदै असामाजिक तत्त्वको घुसपैठ भएको हुनसक्ने बताएका छन्। राजाले विद्यार्थीहरुलाई सम्बोधन गर्दै प्रश्न सोधेका छन्, आफू पनि नपढ्ने, अरुलाई पनि पढ्न नदिने ? राजाको भाषामा “यस्तो अशोभनीय र समाजमा नसुहाउने काम “तुरुन्त रोक्न पनि राजाले आह्वान गरेका छन्। बाँकी (more…)

स्कूल जान छाडेर आन्दोलनको आगो दन्काइरहेको एक बालक। तस्वीरः ध्रुव आले

पेट्रोलियम पदार्थमा गरिएको मूल्यवृध्दिपछि दिनहुँ राजधानीका विभिन्न क्याम्पस अगाडि प्रहरी र विद्यार्थीबीच भिडन्त हुने गरेको छ। दिनहुँ क्याम्पस अगाडिका सडक विद्यार्थीहरुले टायर जलाएर अवरुध्द पार्छन् र त्यसलाई खुलाउन प्रहरीले अश्रुग्यास प्रहार गर्छ। प्रस्तुत छ फोटो ब्लग। यी फोटोहरु फोटो पत्रकार ध्रुव आलेको सौजन्यबाट प्राप्त भएको हो। बाँकी (more…)

डाउनलोड गरी सुन्न यहाँ क्लिक गर्नुहोस्। अथवा यहाँ पनि क्लिक गर्न सक्नुहुन्छ। (mp3 format, 384kb)
पछिल्लो लिङ्कमा क्लिक गर्दा तपाईँले ४५ सेकेण्ड पर्खनु पर्ने हुन्छ। त्यसपछि मेगाअपलोडको लोगोनजिकैको दायाँ छेउको Click here to download मा क्लिक गरी फाइल डाउनलोड गर्नुपर्छ। कुनै समस्या परेमा वा सुझाव सल्लाह दिनका लागि प्रतिक्रियामा लेख्नुहोला।

२०६२ भदौ ९ बिहीबार
नेपाली काँग्रेसको ११ अ‍ौं महाधिवेशन सुरु हुन अब ६ दिनमात्र बाँकी छ। यसक्रममा पार्टीबीच नयाँ नीति र कार्यक्रमका बारेमा बहस सुरु भएको छ। विधान संशोधनका लागि विधान संशोधन समितिका बैठकहरु पनि भइरहेका छन्। यसै सन्दर्भमा काँग्रेसभित्रका कुरा बुझ्न सजिलो होस् भन्ने अभिप्रायका साथ विधान संशोधन समितिमा महासमिति सदस्य लोकेश ढकालले प्रस्तुत गरेको सुझावका केही अंश यहाँ जस्ताको तस्तै प्रस्तुत गरिएको छ। यसमा उल्लेख विचारसँग मेरो संसारको सहमति-असहमतिको अर्थ छैन। न यसले मेरो संसार कुनै पार्टी विशेषसित नजिकिएको अर्थ नै निकाल्न मिल्छ। बाँकी (more…)

२०६२ भदौ ८ बुधबार
माघ १९ पछि बम आतंकको कुरा दुर्लभ भएको भए पनि अब फेरि बढ्न थालेको छ। आज मात्रै काठमाडौंका दुई ठाउँमा बम आतंक मच्चियो। नयाँ बानेश्वरको बेकरी क्याफेबाहिर र इन्द्रचोकको राखी बजारबाहिर बम राखिएको आशंकामा दुई घण्टासम्म जनजीवन आतंकित भएको थियो। तर दुवै ठाउँमा सेनाको डिस्पोजल टोलीले बम भएको आशंका गरिएको ब्यागमा बकवास कुरामात्र भेट्टाएको थियो। नयाँ बानेश्वरमा ट्राउजर भेटिएको थियो भने इन्द्रचोकमा पुराना लुगा। उता माअ‍ोवादीहरु राजाको जुन जिल्लामा भ्रमण हुन्छ त्यही ठाउँ बन्द गर्ने भन्दै कुर्लँदै छन्। तर नेटिभीको समाचार हेर्दा भने मान्छेहरु …..प्राणभन्दा प्यारो छ भन्दै नारा लगाइरहेकै देखिन्छन्।

२०६२ भदौ ८ बुधबार

हिजै एकजना “टेक क्रेजी” मित्रले मेल गरेको थियो, भोलिबाट गुगलले च्याट सफ्टवेयर पनि लञ्च गर्ने संभावना छ भनेर। तर हिजो सार्‍है अल्छी र निद्रा पनि लागिसकेको हुनाले ब्लगमा हालिनँ। आज बिहान अफिसमा आएर हेर्दा त हो रहेछ सारा टेक न्युजहरु गुगलको यही च्याट सफ्टवेयरको बारेमा भरिएको रहेछ। लौ न त, अब हामी पनि गुगलबाट च्याट गर्न थाल्ने हैन ?
यसका लागि तपाईँले आफ्नो कम्प्युटरमा गुगल टक इन्स्टल गर्नुपर्ने हुन्छ। तपाईँ यसलाई यहाँ क्लिक गरी डाउनलोड गर्न सक्नुहुन्छ। यसको आकार पनि सार्‍है हलुका छ 900 kb मात्र। तर विन्डोज एक्सपी र 2000 मा मात्र यो प्रयोग हुन्छ। अनि यसमा भ्वाइस च्याट पनि हुने रहेछ। रिभ्युहरुमा भ्वाइस च्याटको गुणस्तर राम्रो भएको उल्लेख गरिएको छ। बाँकी (more…)

यो ब्लग विशेष गरी विदेशमा बस्ने नेपालीको लागि हो। यहाँकाहरुले टेलिभिजनमा यी दृश्य हेर्नुभएकै होला। विदेशमा बस्नेहरुले काठमाडौँमा भइरहेको घटनालाई हेर्न सक्षम होउन् भन्ने मेरो उद्देश्य हो। विद्यार्थी र प्रहरीबीच भएको भिडन्तको दृश्य डाउनलोड गर्न यहाँ क्लिक गर्नुहोला। यो लिङ्कमा माउस राखेर राइट क्लिक गरी Save Target As गर्नुस् र फाइल खोली हेर्नुस्। समस्या भए लेख्नुहोला।

२०६२ भदौ ६ सोमबार
‘एक दुई जनाले हामी जनताको प्रतिनिधित्व गर्छौं भनेर कराउँदैमा केही हुँदैन’
यो महावाणी २१ अ‍ौं शताब्दीको देखिने र सुनिने हाम्रा राजा श्री छ (सरी है, यो युनिकोडमा टाइप गर्दा सिफ्ट कि थिच्यो भने सँधै ५ को ठाउँमा छ आउने गर्छ। परम्परागत प्रीति फन्टमा भने ५ टाइप गर्न सिफ्ट कि थिच्नै पर्थ्यो) ज्ञानेन्द्रको हो। आजदेखि सुदूरपश्चिमाञ्चलको भ्रमण थालेका राजाले अञ्चल प्रशासन कार्यालयमा आफैद्वारा मनोनीत महाकाली अञ्चलका चारै जिल्लाका सभापति एवं उपसभापतिहरूलाई निर्देशन दिँदै उक्त कुरा भनेका हुन्। नेटिभीमा हेरेको थिएँ राजाको भिजुअल। निकै गम्भीर भएर निर्देशन दिँदैथिए राजा। यस्तो लाग्थ्यो मानौं निर्देशन राजा हैन, प्रधानमन्त्री वा नेता दिँदैछन्। ‘सबैभन्दा मुख्य कुरा शान्ति स्थापना हो, त्यसका लागि सबैको एकजुट प्रयास हुनैपर्छ’-श्री ५ बाट यसरी हुकुम बक्स भइरहँदा उता रुपन्देहीमा भने चार प्रहरी माअ‍ोवादीको एम्बुसमा परी मारिएका थिए। राजाले महेन्द्रनगरमा साढे एकघण्टाभन्दा बढी समय पैदल सवारी भई त्यहाँ एकत्रित हजारौँ (मान्छे धेरै नै देखिन्थे, किन झूठो बोल्नुर? पूर्वाग्रहीले मात्र बोल्छ झूठो) नरनारीबाट पुष्पगुच्छा ग्रहण गर्दै प्रत्यक्ष संवाद पनि गरे। एक अपांगले ढोग्न खोज्दा भो-भो पर्दैन भनेको अनि बालबालिकाहरुलाई अटोग्राफ दिएका दृश्य पनि नेटिभीमा देखाइएको थियो। राजालाई पनि सिनेमाका नायक जस्तै के अटो दिन मन लागेको होला, बुझिनसक्नु छ।

उफ ! अझै खुलेन मेरो मोबाइल

२०६२ भदौ ६ सोमबार
छ महिनाभन्दा बढी समयपछि मेरो प्रि-पेड मोबाइलले आंशिक रुपमा काम गर्न थालेको छ। अहिले साढे ११ बजेबाट मेरो मोबाइल सेटमा टावर देखिन थालेको छ। तर दुःखको कुरा, कुनै नम्बरमा डायल गर्दा भने एउटी महिलाको यस्तो कर्कश ध्वनि सुनिन्छ

“यस्तो सेवा निषेध गरिएको छ”

अनि अंग्रेजीमा पनि यसो भनिन्छ This type of call is restricted अनि सामान्य लायन्डलाइनबाट मोबाइलमा फोन गर्दा पनि सम्पर्क हुँदैन। हैन यो कस्तो खालको सेवा दिन थालेको हो नेपाल टेलिकमले ? फोन गर्न पनि नमिल्ने, आउँदा पनि नआउने ? बाँकी (more…)

तपाईँहरुलाई हाम्रा नेताहरुको कुरा कतिको विश्वास लाग्छ ? शायद थोरै होला विश्वास गर्ने। तर राम्रो कुरा अविश्वासिलो नै सही, सुन्दा रमाइलो हुने रहेछ। कुरा के भने नेपाली राजनीतिका खत्तम नेताहरु मध्ये एक माधव नेपाल अब महासचिव नबन्नुहुने भएको छ। अब अर्का कुहिएका नेता गिरिजा चाहिँ कहिले जाने हुन् कुन्नि। बाँकी (more…)

२०६२ भदौ ६ सोमबार
राजा सुदूरपश्चिमाञ्चल र मध्यपश्चिमाञ्चल विकास क्षेत्रको वस्तुस्थिति बुझ्न आज त्यसतर्फ सवारी हुने तयारी गरिरहँदा माअ‍ोवादीहरुले पश्चिमको बुटवलमा एम्बुस विस्फोट गराई चार प्रहरी र एक सर्वसाधारणको ज्यान लिएका छन्। घटना मणिग्रामस्थित राममणि बहुमुखी क्याम्पसनजिकै भएको र उनीहरु क्याम्पसमा हुन लागेको बीबीएसको परीक्षाको सुरक्षाका लागि त्यतातर्फ गएको बताइएको छ। उनीहरु सबै बुटवलस्थित इलाका प्रहरी कार्यालयमा कार्यरत थिए। मारिने एक सर्वसाधारणको सनाखत हुन सकेको छैन। एम्बुस विस्फोटका कारण प्रहरी भ्यान पूर्ण रुपमा क्षतिग्रस्त भएको छ। थप समाचारका लागि परेवामा जानुस्।

२०६२ भदौ ६ सोमबार

[माअ‍ोवादीले भदौ ७ गते सार्वजनिक गरेको सबै ६० युध्दबन्दीहरुको नाम भित्र अपडेट गरिएको छ]
कालिकोटको पिलीस्थित सैनिक आधार शिविरमा गत साउन २३ गते गरिएको आक्रमणपछि माअ‍ोवादीले आफूसँगै लगेका ६० शाही सैनिकको बारेमा सेनाले सुँइकोसम्म लगाउन नसकेको भए पनि कर्णाली पोस्ट पत्रिकाका पत्रकार अशोककुमार सिंहले ती सैनिकहरुलाई पिलीबाट पूर्व दक्षिणमा पर्ने एक गाविसमा भेटी तस्वीरसमेत लिन सफल भएका छन्। तस्वीरमा माअ‍ोवादीको कब्जामा रहेका शाही सेनाका युध्दबन्दीहरु, घाइते युध्दबन्दीहरु र सेनाबाट लुटिएका हतियार देखाइएको छ। (more…)

२०६२ भदौ ५ आइतबार

पेट्रोलियम पदार्थको मूल्यवृध्दिको विरोधमा अमृत साइन्स क्याम्पस र शंकरदेव क्याम्पस बाहिर भएको विरोध प्रदर्शनमा प्रहरी हस्तक्षेप हुँदा ३० विद्यार्थी घाइते भएका छन्। प्रहरीतर्फ पनि आधा दर्जन जति घाइते भएका छन्। विद्यार्थीले टायर र पुत्ला जलाएका थिए। प्रहरीले १० राउन्ड अश्रुग्यास प्रहार गरेको थियो। घाइते विद्यार्थीमध्ये ५ को अवस्था चिन्ताजनक भएको बताइएको छ। आज बसेको सात दलको बैठकले पनि प्रहरी हस्तक्षेपको विरोध गर्दै आन्दोलन चर्काउने निर्णय गरेको छ। (more…)

व्यस्तताका कारण यो अडियो ब्लग पोस्ट गर्न ढिला भएकोमा क्षमा माग्दै गएको हप्ता नागरिक समाजको आयोजनामा भएको नागरिक धर्ना कार्यक्रमको अडियो ब्लग आज पोस्ट गरेको हुँ। अडियो ब्लग डाउनलोड गर्न यहाँ क्लिक गर्नुहोला वा यहाँ क्लिक गर्नुहोला।मध्यरातमा अरुको निद्रा नबिग्रियोस् भनी सचेत हुँदै सानो स्वरमा बोलेको छु। त्यसैगरी ठूलो आकारको फाइललाई सानो बनाउने क्रममा गुणस्तरमा अलि बलिदानी दिन परेकोले सुन्दा भोल्युम सानो बनाएर एकान्तमा सुन्नुहोला।

सूचनाः मेरा भिडियो र अडियो हेर्न-सुन्नका लागि तपाईँको कम्प्युटरमा Windows Media Player हुनुपर्छ। यसलाई तपाईँ यहाँ क्लिक गरेर डाउनलोड गर्नसक्नुहुन्छ। केही समस्या भएमा मलाई जानकारी दिनुहोला।

२०६२ भदौ ५ आइतबार
राजा र माअ‍ोवादी फेरि एक पटक आमने सामने हुने भएका छन्। भर्खरै गिरिजाको गृहनगर विराटनगरको सडकमा पैदल हिँडेर अप्रत्यक्ष चुनौति दिएका राजाले भोलिदेखि सुदूरपश्चिमाञ्चल र मध्यपश्चिमाञ्चल विकास क्षेत्रको भ्रमण गर्दैछन्। यस भ्रमणलाई राजदरबारको विज्ञप्तिमा अनौपचारिक र त्यहाँको वस्तुस्थिति बुझ्नका लागि गरिने भ्रमण भनिएको छ। सुदूरपश्चिमाञ्चल र मध्यपश्चिमाञ्चलमा माअ‍ोवादीको गतिलो उपस्थिति छ। माघ १९ पछि पहिलो पटक केही दिनअघि पूर्वाञ्चलको भ्रमण सकेलगत्तै थप यी क्षेत्रका भ्रमण गरी संयुक्त राष्ट्रसंघको महासभामा भाग लिन न्युयोर्क प्रस्थान गर्नुअघि राजाले देशको वस्तुस्थिति बुझ्न लागेका हुन्। न्युयोर्क भ्रमणका लागि सरकारको भ्रमण तालिका २२ दिन लामो भएको स्रोतले बताएको छ। स्रोतका अनुसार राजाबाट जर्मनी र जापानको समेत भ्रमण हुनेछ। न्युयोर्कमा त नेपालीहरुले सेप्टेम्बर १६ शुक्रबारका दिन विरोध प्रदर्शन गर्ने कार्यक्रम तय गरिसकेका छन्। जापान र जर्मनीका नेपालीहरुले चाहिँ के सोचिरहेका छन् कुन्नि। तपाईँलाई थाहा भए बताउनुस् है !

नरहरि आचार्यको गिरिजालाई सुझाव
२०६२ भदौ ४ शनिबार
११ अ‍ौं महाधिवेशनका लागि १० दिन बाँकी छँदा आज काँग्रेसका केही प्रभावशाली नेताहरुले सभापति गिरिजालाई उनकै निवासमा गएर भेटेछन् र त्यहीँ केन्द्रीय सदस्य नरहरि आचार्यले भनेछन्, तपाईँ यसपालि सकेसम्म सभापतिमा नउठ्नुस्, म उठ्छु। गिरिजा उठे पनि आफू उठ्ने उनले बताए। गिरिजाले के भने त भनेर सोध्दा उनले भने, उहाँले केही भन्नुभएन। काँग्रेसलाई आफ्नो पुर्ख्यौली सम्पत्ति ठान्ने गिरिजाले त्यसै छाड्छन् भन्ने ठानेका छन् कसैले भने गल्ती हुनेछ जस्तो मलाई लाग्छ। हाम्रा एक कमेन्ट लेख्ने साथीले भने जस्तो प्रजातान्त्रिक दलमा अप्रजातान्त्रिक रुपमा सभापतिले मनोनयनबाट सदस्य र पदाधिकारी राख्ने प्रथाको विरोध गर्दै अब सबैमा निर्वाचन हुनुपर्ने माग पनि आज गिरिजालाई भेट्न जाने एक दर्जन नेतामध्ये अधिकांशले उठाएछन्। तर त्यसको विरोध भने सुशील कोइरालाले गरेछन् रे। किन होला ? भनिरहन पर्छ र ?

२०६२ भदौ ४ शनिबार

गाइजात्रामा मैले राखेका गाइजात्रे समाचारलाई धेरैले साँच्चिकै समाचार ठानेछन्। हुन पनि यस्तो हुने अनुमान धेरैले गरेका थिए। तर मैले समाचार गाइजात्रे होलान् भनी चाल पाउन् भनी मास्टहेड उल्टो राखेको थिएँ र समाचार सूत्र पनि त्राजाइगा भनेर उल्लेख गरेको थिएँ। त्राजाइगा अर्थात् उल्टोबाट गाइजात्रा। एक मित्रले राजाबाट त्यस्तो घोषणा भएकोले विरोधस्वरुप लोगो उल्ट्याएको होला भन्ने ठानेछन् भने अर्का मित्रले चाहिँ ब्यान होला भन्ने डरले लोगो नबुझिने बनाएको होला भन्ने ठानेछन्। त्यसो त आज काठमाडौंमा प्रचण्डलाई गोली ठोकी मारियो भनी गाइजात्रे समाचार छापिएका पत्रिका साँच्चिकैको समाचार भन्ठानी खुब बिके। पत्रिका बेच्ने ठाउँमा मान्छेको भीड बढेको थियो। हकरहरु पनि उस्तै फेरि। आज काठमाडौंमा समलिङ्गीहरुले जुलुस निकाले। यसको फोटो फिचरका लागि भित्र आउनुस्। (more…)

आज साँझ ५ बजे शाही घोषणा

२०६२ भदौ ४ शनिबार
श्री ५ बाट नेपाल अधिराज्यको संविधान धारा १२७ बमोजिम राजनीतिक दलहरुमाथि ५ वर्षका लागि प्रतिबन्धको घोषणा गरिबक्सेको छ। यस सम्बन्धमा आज साँझ ५ बजेको साइटमा रेडियो र टेलिभिजनबाट देशवासीका नाममा विशेष शाही सम्बोधन बक्स हुने बताइएको छ। दरबारनिकट मेरा मित्र त्राजाइगाले जनाएअनुसार श्री ५ बाट धारा १२७ का अलावा राजा देशका संरक्षक हुने प्रावधान रहेको धारा ११७ को पनि उल्लेख शाही सम्बोधनमा गरिबक्सनेछ। तीन वर्षभित्र शान्ति ल्याई निर्वाचन गराउने प्रतिवध्दता हुकुम बक्स हुँदाहुँदै पनि बारम्बार आन्दोलनका नाममा जनता भाँड्ने कार्यमा राजनीतिक दलका नेता क्रियाशील हुन थालेकाले हाललाई ५ वर्षका लागि नेपाल अधिराज्यमा दर्ता भएका वा नभएका सबै राजनीतिक दलहरुलाई प्रतिबन्ध लगाउन लागिएको सम्बोधनमा उल्लेख छ। सूत्रका अनुसार राजनीतिक हलचलका लागि कुख्यात रहेको शुक्रबारका दिन नै शाही सम्बोधन हुनुपर्ने भए पनि आजको मिति अत्यन्तै साइटमा रहेकोले आज यसको घोषणा गर्न लागिएको हो। सम्बोधनमा संविधानको धारा १२७ अनुसार जारी यस प्रतिबन्धको आदेश उल्लंघन गरी राजनीतिक दलका नाममा कुनै गतिविधि गरेको वा गर्न लागेको पाइएमा आजन्म कैद हुनेछ। आज साँझ ५ बजे शाही घोषणा हुने भए पनि त्राजाइगाले मलाई शाही सम्बोधनको पूर्ण विवरण भर्खरै मात्र मलाई उपलब्ध गराएका छन्। त्राजाइगाकी साली राजदरबारमा टाइपिस्ट हुन्। उनले नै सुटुक्क यो सम्बोधन उनलाई इमेल गरी पठाएका रहेछन्। मेरो संसार सगर्व प्रस्तुत गर्दछ आज साँझ हुने शाही घोषणाको पूर्ण पाठ। पूर्ण पाठका लागि यहाँ क्लिक गर्नुस्।

२०६२ भदौ ४ शनिबार

राजाले राजनीतिक दलमाथि प्रतिबन्ध लगाउने सुँइको पाउनेबित्तिकै नेपाली काँग्रेसका सभापति गिरिजाप्रसाद कोइराला गृहनगर विराटनगरस्थित आफ्नो निवासबाटै बेपत्ता हुनुभएको छ। आज बिहान ६ बजे नै कोइरालानिवास घेर्न गएका सेनाहरुद्वारा अहिले उनको व्यापक खोजी भइरहेको छ र आत्मसमर्पण गर्न विराटनगरवासीको कानै टट्टिने गरी माइकिङ भइरहेको छ। बाँकी (more…)

२०६२ भदौ ४ शनिबार
राजाले राजनीतिक दलमाथि प्रतिबन्ध लगाई नयाँ मोडेलको व्यवस्था लागू गराउने सुँइको पाएपछि हिजो मध्यरातबाट सुरु भएको एमालेका नेताहरुको बैठकमा गम्भीर मतभेद निस्किएको र पार्टी विभाजित हुने स्थितिसम्म पुगेको बताइएको छ। महासचिव माधवकुमार नेपालले अब यो स्थितिमा टिक्ने र आफ्नो बाटो खुला गर्ने अर्को बाटो नभएको हुँदा शाही घोषणाको स्वागत गर्दै वक्तव्य जारी गर्नुपर्ने तर्क राखेका थिए। अ‍ोली र वामदेवहरुले भने तत्काल भूमिगत भई भारतको सहयोगमा गिरिजासित मिलेर ०४६ सालमा जस्तो आन्दोलन वा सशस्त्र क्रान्ति गर्नुपर्ने राय प्रकट गरेका थिए। महासचिव नेपालले भारतको समेत भित्री समर्थन बिना राजाबाट यस्तो कदम चाल्न नसक्ने हुनाले भारतले बाहिरबाट मात्र आफूहरुलाई समर्थन गरी भारतको शरणार्थी बनाउन सक्ने आशंका प्रकट गरेका छन्। वामदेवले भने भारतमा सम्पर्क गर्न खोज्दा सम्पर्क नभएको तर दूतावासबाट भने सहयोग हुने आश्वासन दिएको बताउनु भएको छ। यसैबीच माधव नेपालले शाही घोषणाको समर्थन गरी तयार पार्नुभएको वक्तव्यको ड्राफ्ट पनि हामीलाई प्राप्त भएको छ। त्यसका लागि यहाँ क्लिक गर्नुस्।

२०६२ भदौ ३ शुक्रबार
राजनीतिक विश्लेषक हरि रोकाले नेपालको राजतन्त्र आर्थिक रुपमा खर्चालु त छ नै दैविक रुपमा पनि अभिशप्त भएको बताउनुभएको छ। उहाँले राजतन्त्र अविछिन्न निरन्तरता नभएको पनि बताउनु भयो। आज मार्टिन चौतारीद्वारा आयोजित एक कार्यक्रममा उहाँले उक्त टिप्पणी गर्नुभएको हो। बाँकी (more…)

सूचनाः मेरा भिडियो र अडियो हेर्न-सुन्नका लागि तपाईँको कम्प्युटरमा Windows Media Player हुनुपर्छ। यसलाई तपाईँ यहाँ क्लिक गरेर डाउनलोड गर्नसक्नुहुन्छ।
अस्तिको नागरिक सभाको अडियो ब्लग गर्छु भनेर भनेको भए पनि मौका नमिलेर त्यसो गर्न सकिरहेको थिएन। पहिले जस्तो डिजिटल क्यामेरामा नै अडियो रेकर्ड गरेको नभएर टेपमा रेकर्ड गरेको हुनाले त्यसलाई डिजिटल रुप दिएर कम्प्युटरमा सार्न र अडियो क्लिपहरुलाई संयोजन गरी एडिट गर्न समय त लाग्छ नै। त्यसमाथि पनि अलि अलि वर्णन सुनाउन शान्त खालको वातावरण चाहिन्छ। यी सबका अभावमा ढिला भइरहेको थियो। तर हिजो एक पाठकले अब त ढिला भएन र भनी हकार्नु भयो। त्यसैले हिजो हतारमा बनाएको धीरेन्द्र प्रेमर्षिको यो व्यङ्ग्यलाई आज यहाँ राखेको हुँ। उक्त कार्यक्रमको पूरा अडियो ब्लग आइतबारसम्ममा म यहाँ राख्नेछु।
धीरेन्द्रको व्यङ्ग्यको अडियो डाउनलोड गर्न यहाँ क्लिक गर्नुहोस्। (378 kb, wma format)