२०६२ कात्तिक १४ सोमबार
हिजो आइतबार एक दिनको विश्रामपछि आज पुनः पडकास्टको परीक्षण प्रसारण लिएर हाजिर भएको छु। पडकास्टको सातौं अंक अलि ठूलो साइजको फाइल बनेको छ। समय पनि झण्डै १७ मिनेट पुगेछ। पडकास्टलाई डाउनलोड नगरी सीधै सुन्न यहाँ क्लिक गर्नुहोला। डाउनलोड गरेर सुन्न चाहनुहुन्छ भने यहाँ राइट क्लिक गरेर सेभ टार्गेट एज गर्नुहोला।
आजका प्रमुख समाचारमा-
-निर्वाचित सरकार पनि राजा कै प्रत्यक्ष निगरानीमा रहने उपाध्यक्ष गिरीको भनाई, नागरिक समाज, दल र गैससले विदेशीको पैसा खाएको आरोप
-निरंकुश सत्ता धेरै नटिक्ने काँग्रेस सभापति कोइरालाको ठोकुवा
-सुन्दर शान्त नेपालको कामना गर्दै भक्तपुरमा हजारौं भेला भए
-सञ्चार अध्यादेशका सम्बन्धमा सर्वोच्चमा छलफल
-आज कुकुर तिहार मनाइँदै
र,
नेपालमा भएको आलु पार्टी (more…)

२०६२ कात्तिक १३, आइतबार
शनिबार दशरथ रंगशालामा आयोजित “मेरो मोबाइल” को एक्स्ट्रिम रक शोमा युवा पुस्ता कसरी मस्त भई झुमेका थिए, कसरी नाचेका थिए, कस्तो थियो भीड- त्यो सब मैले यो भिडियो ब्लगमा समेट्ने कोशिश गरेको छु। यो भिडियो ब्लगलाई दर्शकको सुविधाका लागि मैले दुई ठाउँमा होस्ट गरेको छु। तपाईँ यहाँ क्लिक गर्न सक्नुहुन्छ। अनि यहाँ पनि क्लिक गर्न सक्नुहुन्छ। डाउनलोड गरी हेर्न चाहनुहुन्छ भने माथिको लिंकमा राइट क्लिक गरेर सेभ टार्गेट एज गर्नुस्। यो भिडियोको फरम्याट wmv र साइज 7 mb रहेको छ। (more…)

२०६२ कात्तिक १२ शनिबार

स्पाइस नेपाल प्रा.लिको मेरो मोबाइल, जसलाई ठट्टामा ज्वाईँको मोबाइलसमेत भन्ने गरिन्छ, ले आज दशरथ रंगशालामा एउटा रक शोको आयोजना गर्‍यो। फोटोमा १९७४ एडीको गीतमा झुम्दै गरेका युवायुवती। १ सय ५० रुपैया पर्ने टिकटका साथमा मोबाइलको सिमकार्ड एउटा पनि निःशुल्क दिने व्यवस्था भएकोले झण्डै ५० हजार जनाले त्यसमा सहभागिता जनाएका थिए। कन्सर्टमा युवराज पारस आफ‌्नो परिवारसहित उपस्थित भई घाँसे मैदानमा बसी रक शो हेरेका थिए।
* हिजो सडकमा लगाइएका जस्ता नारा यहाँ कसैले लगाएनन्। यहाँको भीड “ड्याम केयर डेमोक्रेसी” भन्ने भीड नै हो त ?
* एक पटक अस्पष्ट रुपमा “फाँसी दे” भनेको जस्तो सुनियो। तर ध्यान दिएर सुन्दा त हैन रहेछ “देउसी रे” भनेका रहेछन्…
* युवतीहरु आवतजावत गर्ने ठाउँमा उनीहरु आउनेबित्तिकै माथिबाट धकेलाधकेल गर्ने, तल झरेर जिउमा छोएर “चान्समा डान्स” गर्नेसम्मका युवकहरु देखिए…..
* लुगा खोलेर नाङ्गै आफ्नै ढंगले मस्त भई नाचिरहेका युवालाई एकछिन म हेरेको हेर्‍यै भएँ….बाँकी ब्लग र थप फोटोका लागि भित्र आउनुहोला। (more…)

२०६२ कात्तिक १२ शनिबार
हिजोको बन्दका क्रममा निस्किएको जुलुस, त्यो जुलुसले लगाएका नारा र जुलुसपछि आयोजित सभाका केही झलकहरु यो भिडियो ब्लगमा समेटिएको छ। यसलाई हेर्न यहाँ क्लिक गर्नुहोला अथवा यहाँ क्लिक गरे पनि हुन्छ। डाउनलोड गरेर हेर्न चाहनुहुन्छ भने यहाँ राइट क्लिक गरी सेभ टार्गेट एज गर्नुस्। यहाँ राइट क्लिक गरी सेभ टार्गेट एज गरे पनि हुन्छ। [5 mb, wmv format] (more…)

२०६२ कात्तिक १२, शनिबार
आजको पडकास्ट समाचार डाउनलोड नगरी सीधै सुन्ने भए यहाँ क्लिक गर्नुहोला। फाइल डाउनलोड गरेर सुन्न चाहनुहुन्छ भने यहाँ राइट क्लिक गरी सेभ टार्गेट एज गर्नुहोला। प्रतिक्रिया लेख्न नभुल्नु होला। समालोचनात्मक प्रतिक्रिया पनि पाउने आशामा।
आजका प्रमुख समाचारमा
सात दलको आह्वानमा भएको उपत्यका बन्दमा ८४ जना गिरफ्तार
सञ्चार अध्यादेशको विरोधमा देशभर प्रदर्शन
कान्तिपुर एफएमबाट मध्यरातमा लुटिएका सामान फिर्ता गर्न राष्ट्रिय मानवअधिकार आयोगको आग्रह
भारतीय विदेश नीतिका विशेषज्ञहरुसँग एमाले नेतृत्वको भेट
र,
कसरी दुःख पाए एक जर्मन अधवैंशेले आफूले पालेको बिरालोबाट
(more…)

२०६२ कात्तिक ११, शुक्रबार

तिमी नागरिकको सूचनाको हक खोसी आँखा, कान बन्द गर्न खोज्छौ, हामी त्यसको विरोधमा बजार बन्द गर्छौं- कालिमाटीमा बन्द भएको बजार।
सात दलले आज आह्वान गरेको उपत्यका बन्दका बारेमा फोटो फिचर हेर्ने भए भित्र आउनु होला। सबै फोटो म आफैले खिचेको हुँ। (more…)

२०६२ कात्तिक ११, शुक्रबार
नागरिकहरुको सूचनाको हकको रक्षाका लागि सात दलले आज आह्वान गरेको कडा कार्यक्रम “बन्द” का क्रममा प्रहरीले दर्जनौँलाई गिरफ‌्तार गरेको छ। बन्द भने पहिले-पहिले जस्तो छैन। मोटरसाइकल धेरै चलेका छन्। ट्याक्सीहरु पनि धेरै नै चलेको देखिएको छ। भाडाका केही गाडीहरु पनि चलेका छन्। पसलहरु भने अधिकांश बन्द नै छन्। शिक्षण संस्थाहरु ठप्प छन्। नेपाल टेलिभिजनले अब आज साँझ बन्दको पूरै अवज्ञा भयो भन्ने समाचार दिन्छ होला। भएकै कुरा त बङ्ग्याउने नेटेलाई आज त मसला छ नि गाडी गुडेको देखाउने ! साँच्ची आजभोलि नेपाल टेलिभिजन यति एकपक्षीय भइसकेको छ कि कहिलेकाहीँ त यस्तो रिस उठ्छ, कहिले हाँसो उठ्छ। आज बिहान ११ बज्नुअघि खिचेका केही भिडियो दृश्य हेर्न यहाँ क्लिक गर्नुस्। डाउनलोड नगरी हेर्न भित्र आउनुहोला। अहिले म खाना खाएर एकछिन रत्नपार्क, न्युरोडतिर जाँदैछु। त्यहाँबाट फर्केपछि थप तस्वीर र भिडियो ल्याउनेछु होला। (more…)

२०६२ कात्तिक ११, शुक्रबार
यो हप्ताको जनआस्था साप्ताहिकले प्रमुख समाचारमा लेखेको राजदरबार प्रवेश गर्न लागेकी सुन्दरी भनेकी यिनी नै हुन्। सन् २००० मा मिस अमेरिका बनेकी यी सुन्दरीको नाम हिथर रेनी फ्रेञ्च हो। राष्ट्रिय राजनीतिक दलहरु मात्रै होइन अन्तर्राष्ट्रिय समुदायबाट पनि आलोचना र असहयोग पाएपछि एक्लिंदै गएको सरकारले अब अन्तर्राष्ट्रिय सम्बन्धलाई सुधार्न एकजना विदेशी सुन्दरीको सहयोग लिने भएको छ । सन् २००० मा मिस अमेरिका बनेकी सुन्दरी हेदर रेनी फ्रेञ्च आफ्ना श्रीमान् केन्टुकी राज्यका पूर्व लेफि्टनेन्ट गभर्नर स्टिथ हेन्रीलाई साथमा लिएर डिसेम्बरको पहिलो हप्ता मरिचमानसिंहको निमन्त्रणामा नेपाल आउंदैछिन्।

सुन्दरी फ्रेञ्चका पति स्टिभ अमेरिकी राष्ट्रपति जर्ज बुशको विरोधी डेमोक्रेटिक पार्टीका प्रभावशाली मानिन्छन् । उनी आगामी निर्वाचनमा डेमोक्र्याटका तर्फबाट सिनेटमा समेत उठ्दैछन्…..

जनआस्थाको पूरा समाचार पढ्न यहाँ क्लिक गर्नुस्।

आज एउटा रमाइलो साइट भेटियो। यो साइटका अनुसार मेरो ब्लगको मूल्य $1,129.08 रहेछ। तपाईँ पनि आफ्नो ब्लगको मूल्य हेर्न चाहनुहुन्छ भने माथिको लिङ्कमा क्लिक गर्नुस्।

२०६२ कात्तिक ११, शुक्रबार
आजको पडकास्ट समाचार डाउनलोड नगरी सीधै सुन्ने भए यहाँ क्लिक गर्नुहोला। फाइल डाउनलोड गरेर सुन्न चाहनुहुन्छ भने यहाँ राइट क्लिक गरी सेभ टार्गेट एज गर्नुहोला। हिजोको पडकास्टपछि प्राप्त प्रतिक्रिया त्यति उत्साहजनक रहेन। यदि दुई चार जनाले मात्रै सुनिरहनुभएको हो भने हाललाई यस्तो झण्झटिलो काम स्थगित गर्नुपर्छ कि के हो ? सुनिरहनु भएको छ भन्ने मात्र थाहा पाए पनि मेहनत ठाउँमा परेको रहेछ भन्ने हुन्थ्यो !
आजका प्रमुख समाचारमा
आज सात दलको आह्वानमा उपत्यका बन्द हुँदै, बन्दको प्रचार गर्नेहरु गिरफ्तार
कान्तिपुर एफएममाथि कुनै कारबाही अगाडि नबढाउन सरकारलाई सर्वोच्चको आदेश
दिनभर धर्ना बसे नागरिक समाज र नेता कान्तिपुर एफएम परिसरमा
सञ्चार अध्यादेशका विषयमा मानवअधिकार आयोगद्वारा सञ्चारमन्त्रीलाई स्पष्टिकरण माग
अमेरिकाले सैन्य र आर्थिक सहयोग नगर्ने
र,
आफ्नै प्रेमीलाई जेल पठाउने प्रेमिका (more…)

२०६२ कात्तिक १०, शुक्रबार
कान्तिपुर एफएमप्रति ऐक्यवध्दता जनाउन आज बिहान आठ बजेदेखि पुल्चोकस्थित सो एफएमको कार्यालयमा मानिसहरु भेला भएका थिए। त्यसै क्रममा मैले खिचेका केही भिडियोहरुलाई मैले यहाँ राखेको हुँ। यो भिडियोलाई डाउनलोड नगरी हेर्न यहाँ क्लिक गर्नुहोला। डाउनलोड गरेर हेर्न चाहनुहुन्छ भने यहाँ राइट क्लिक गरी सेभ टार्गेट एज गर्नुहोला। (more…)

२०६२ कात्तिक १० बिहीबार

कान्तिपुर एफएमका अध्यक्ष हेमराज ज्ञवाली सर्वोच्चको स्टे अर्डरको प्रतिलिपि नियाल्दै। तस्वीरः उमेश
२४ घण्टे म्याद जारी गरेर कान्तिपुर एफएमलाई बन्द गराई अरु एफएमलाई थर्काउँदै नागरिकको सुसूचित हुने हक र अभिव्यक्ति स्वतन्त्रता हनन् गर्न खोज्ने शाही सरकारलाई आज सर्वोच्चले ठूलो धक्का दिएको छ। सर्वोच्च अदालतले आज दायर रिटमाथि आजै सुनुवाई गरेर आजै अर्को निर्णय नभएसम्म तत्काल केही कारबाही नगर्न आदेश दिएको छ। (more…)

२०६२ कात्तिक १० बिहीबार
पडकास्टका लागि भ्वाइस रेकर्ड गर्न सार्‍है गार्‍हो भइरहेको थियो। क्यामेराबाटै आवाज रेकर्ड गरिरहेको थिएँ। त्यसो गर्न झण्झट हुने हुनाले आज न्युरोड गएर एउटा माइक किनेर ल्याएँ। महँगो रहेछ राम्रो खालको माइक। ५०० रुपैया पर्‍यो। दसैंमा टीका थाप्दा पाएको दक्षिणा थियो, त्यही खर्च गरेँ।
आजको पडकास्ट डाउनलोड नगरी सीधै सुन्न यहाँ क्लिक गर्नुहोला। डाउनलोड गरेर सुन्न चाहनुहुन्छ भने यहाँ राइट क्लिक गरी सेभ टार्गेट एज गर्नुहोस्।
[आज यो पडकास्ट डाउनलोड नगरी सुन्न यहाँ नेपालमा अलि गार्‍हो भयो। तपाईँहरु कहाँ कस्तो सुनिन्छ, कमेन्टमा लेख्नुहोला। माथिको फाइलमा सुन्न समस्या हुनेले यहाँ क्लिक गर्नुहोला। शायद यसबाट समस्या समाधान होला कि !]
आजका प्रमुख समाचारमा
एमाले र माअ‍ोवादीबीच उच्चस्तरीय वार्ता, युध्दविराम छिट्टै भंग हुन सक्ने संभावना
सरकार र प्रेसको द्वन्द्व चरम सीमामा, सरकारले कान्तिपुर एफएम बन्द गराउने संकेत
जोखिम मोलेर राजसंस्थाले निर्वाचन गराउन नहुने सभामुखको विचार
निर्वाचन बहिस्कार गर्न मानवअधिकारवादी समूहहरुको आह्वान
र,
लिलाम हुँदैछ बेलायतको एक राजनीतिक पार्टी (more…)

यो भिडियो ब्लग अस्तिको दिन नै गर्नु पर्ने हो। तर त्यो दिन भिडियो फाइल होस्ट गर्ने दुई तीन ठाउँमा नै समस्या देखा परेको थियो। त्यसैले आज बल्ल सार्वजनिक गरेको हुँ। अस्ति प्रेस स्वतन्त्रताका पक्षमा युवाहरुले निकालेको जुलुसको भिडियो यसमा छ। अन्त्यमा जुलुसपछिको कोणसभामा प्ररायुसंघका अध्यक्ष गोकर्ण विष्टको सानो सम्बोधन पनि यसमा संलग्न छ। यसलाई डाउनलोड गर्न यहाँ क्लिक गर्नुस्। [wmv format, 7 mb]

२०६२ कात्तिक ९, बुधबार
नाममा के छ र ? भनी सेक्सपियरले जति नै फलाके पनि मान्छेलाई नाम नभई हुन्न क्या रे। नामको महत्त्व त ठूलो पो छ त। मान्छेलाई मात्र हैन सबैथोकलाई नामको आवश्यकता हुन्छ। पार्टीलाई त नामको आवश्यकता हुने नै भयो। दरबारनिकट भनेर चिनिने तर हालका दिनमा दरबारकै सरकारको चर्को विरोध गर्दै हिँड्ने अनि मन्त्रिमण्डल पुनर्गठन भएमा आफू पनि मन्त्री बन्न सक्ने कुरा खुल्लमखुल्ला बताउँदै हिँड्ने केशरबहादुर विष्टले पनि नयाँ पार्टी गठन गर्दैछन्। त्यसका लागि नाम खाँचो परेर उनले आजको कान्तिपुर दैनिकमा विज्ञापन छपाएका रहेछन्। हाल उनको समूहको नाम राष्ट्रिय समस्या समाधानका लागि समान विचार रहेको छ। मलाई अचम्म लाग्यो, पार्टीको नामसमेत आफै जुराउन नसक्नेले कसरी त्यत्रो राष्ट्रिय समस्याको समाधान गर्लान् त खै ? जे होस्, पत्रिकामा विज्ञापन छपाएर दलको न्वारन गर्ने रेकर्ड भने उनले नै बनाउलान् जस्तो छ। तपाईँसित पनि नाम छ भने सुझाव दिइहाल्ने कि ? तर उत्कृष्ट नाम पठाउनेलाई पुरस्कारको व्यवस्था भने रहेनछ नि फेरि।

२०६२ कात्तिक ९ बुधबार
आजको पडकास्ट समाचार डाउनलोड नगरी सीधै सुन्ने भए यहाँ क्लिक गर्नुहोला। फाइल डाउनलोड गरेर सुन्न चाहनुहुन्छ भने यहाँ राइट क्लिक गरी सेभ टार्गेट एज गर्नुहोला। हिजोको पडकास्टपछि प्राप्त प्रतिक्रिया त्यति उत्साहजनक रहेन। कम्तीमा तपाइँहरुले सुनिरहनुभएको छ कि छैन त मैले थाहा पाउनु पर्‍यो नि, हैन र ? अब पडकास्टमा अलि बानी पर्न थालेको छ। आज हिजोभन्दा कम समय लाग्यो फाइलहरु एडिट गर्दा। आजको पडकास्टमा मुख्य समाचारमा-
चीनले नेपाललाई ७ करोड रुपैयाको सैन्य सहयोग गर्ने
सिंहदरबारअगाडि दिउँसै लाखौं लुट्ने प्रयास
काँग्रेस र एमालेले दल दर्ता नगर्ने
कान्तिपुरको समर्थनमा अमेरिकाले मुख खोल्यो
र,
आफ्नो श्राध्दको भोज आफै खुवाए एक बेलायतीले (more…)

कार्टर सेन्टरको तत्वावधानमा अमेरिकामा द्वन्द्व समाधानको प्रशिक्षण लिन आइपुगेका नेपाली नेताहरुको बिजोग भएछ। विमलेन्द्र निधिको भिडियो क्यामरादेखि लिएर महेन्द्र लावतीको ल्यापटप लगायतका केही बहुमूल्य सामान अनि रामशरण महतको प्लेन टिकटसमेत उनीहरु चढेको गाडीको सिसा फोडी चोरी भएछ। अमेरिकास्थित ब्लगका नियमित पाठकको रिपोर्ट पढ्न भित्र आउनुस्- बाँकी (more…)

२०६२ कात्तिक ८ मंगलबार
हिजोको पडकास्टपछि प्राप्त प्रतिक्रिया उत्साहजनक देखिएकोले हौसिएर आज पनि पडकास्ट गर्न तम्सिएको हुँ। आजको समाचारका लागि डाउनलोड नगरी सीधै सुन्ने भए यहाँ क्लिक गर्नुहोला। फाइल डाउनलोड गरेर सुन्न चाहनुहुन्छ भने यहाँ राइट क्लिक गरी सेभ टार्गेट एज गर्नुहोला।
पडकास्ट गर्दा अडियो फाइलहरु एडिट गर्न सार्‍है झण्झट हुने रहेछ। न्युज पडकास्ट भएकोले पनि त्यसो भएको होला। समय निकै नै खाने रहेछ। सुन्दा त्यस्तो अनुभव हुँदैन तर बनाउन भने झण्झटको काम रहेछ। यति झण्झटिलो काम गरेवापत सल्लाह सुझावका दुई शब्द कमेन्टमा नलेखिदिने हो भने मेरो हौसला कसरी बढ्ला त ? (more…)

२०६२ कात्तिक ७ सोमबार
आज इन्द्रचोकमा कालो अध्यादेश जलाउन खोज्दा प्रहरीले हस्तक्षेप गर्‍यो। ठ्याक्कै त्यतिबेला ब्याट्री सकियो। तर झडप लामो समयसम्म भयो। त्यो झडपलाई मैले भिडियो ब्लगका रुपमा प्रस्तुत गरेको हुँ। यो भिडियोको साइज ठूलो भएकोले अपलोड गर्न निकै समस्या भयो। त्यसैले सजिलो उपायका रुपमा सेभफाइलमा होस्ट गरेको छु। यहाँ क्लिक गरी नयाँ पेज खुलेपछि डाउनलोड लेखिएको ठाउँमा क्लिक गरी फाइल डाउनलोड गर्नुस्।
भिडियो हेर्न असमर्थ हुनेहरुका लागि मैले भिडियोका केही दृश्य भित्र राखेको छु। त्यहाँ पनि हेर्न सक्नुहुन्छ। (more…)

२०६२ कात्तिक ७ सोमबार

जब कलमलाई जञ्जीरले बाँधिन्छ, एफएमका माइकका तार चुँडाइन्छन्, तब यसरी विरोध गर्नुको विकल्प रहँदैन। अहिले केही छिनअघि भोटाहिटीमा प्ररायुसंघले कालो अध्यादेशका विरोधमा जुलुस निकालेर इन्द्रचोकमा कोणसभा गर्‍यो। कोणसभापछि अध्यादेश जलाउन खोज्दा प्रहरीले हस्तक्षेप गर्‍यो। यस सम्बन्धी भिडियो, अडियो र थप तस्वीरसहित म छिट्टै नै ब्लग लेख्दैछु। (अपराह्न ४३० NST)

२०६२ कात्तिक ७ सोमबार
दसैंभर म पडकास्टको बारेमा सोधखोज गरिरहेको थिएँ। विदेशमा पडकास्ट ज्यादै लोकप्रिय भइसक्यो। सन् २००४ लाई ब्लगको वर्ष भने जस्तै २००५ लाई पडकास्टको वर्ष भनिएको छ। नेपालीमा पडकास्ट कतै देखिनँ मैले। अहिले फूर्सद पनि भएको बेला किन नेपालीमा पडकास्ट नगर्ने त भन्ने विचार आयो र सुरु गर्ने जमर्को गरेको हुँ। आजको परीक्षण प्रसारणमा समाचार राखेको छु। यस्तो समाचार दिनहुँ दिन पाए हुन्थ्यो। तपाईँहरुको साथ पाएमा दिनहुँ पनि गर्नेछु। समाचार बाहेक अरु विविध विषय र सांगीतिक पडकास्ट पनि म गर्न जमर्को गर्नेछु।
मेरो संसारको पहिलो पडकास्टको परीक्षण प्रसारण डाउनलोड नगरी सिधै सुन्न यहाँ क्लिक गर्नुस्।
डाउनलोड गरेर सुन्न चाहनुहुन्छ भने यहाँ राइट क्लिक गरेर सेभ टार्गेट एज गर्नुस्।
आफ्ना सल्लाह, सुझाव लेख्न नबिर्सनु होला नि फेरि।

अपडेट २ सरकारले प्रतिबन्ध लगाएको हैन जस्तो लाग्यो। साउदी अरबका एक पाठकले भर्खरै च्याटमा त्यहाँ पनि साइट नखुलेको जानकारी दिए। कान्तिपुरले नै झूर सर्भरमा होस्ट गरेको जस्तो छ यो साइट। (राति ९ बजे)
अपडेट १ कान्तिपुर दैनिकको अन्तिम पृष्ठमा आधा पेज ढाकिने एफएमको साइटको विज्ञापन अहिले साँझ देखेपछि शंका लाग्यो- कतै सरकारले यो साइटमाथि प्रतिबन्ध लगाएको त हैन ? www.kfm961.com टाइप गर्दा मेरो वर्ल्डलिंकको इन्टरनेटबाट अझै पनि पेज खुल्दैन। तर प्रोक्सी साइटबाट चलाएर हेर्दा भने खुल्यो। यद्यपि साइट निकै ढिला खुलिरहेको छ। प्रोक्सीबाट खुल्ने, सिधै नखुल्ने त प्रतिबन्ध लगाइएका साइटहरुमा मात्र हुने गर्थ्यो। यद्यपि, साइट होस्टिङमा खराबी भएको पनि हुनसक्छ। विदेशमा यो साइट खुल्छ कि खुल्दैन, कमेन्टमा लेख्नुस् है ! (साँझ ७ बजे)

“लञ्च”पछि पनि खुलेन कान्तिपुर एफएमको साइट
२०६२ कात्तिक ६ आइतबार
आफ्नो सातौं वार्षिकोत्सवका अवसरमा कान्तिपुर एफएमले हिजो राति एफएम र टेलिभिजनमा एक साथ एक भड्‍‍किलो उत्सव लाइभ प्रसारण गरेको थियो। आरजेहरु अंगालो हाल्दै नाच्दै राति सामान लुट्न आउने सरकारलाई गिज्याइरहेका थिए। गायकगायिकाहरुले गीत गाएका थिए। अनि त्यही कार्यक्रममा एफएमका अध्यक्ष हेमराज ज्ञवालीले देशविदेशका स्रोताहरुका लागि भन्दै ल्यापटपमा बटन थिचेर कान्तिपुर एफएमको अफिसियल साइट लञ्च गरेका थिए। साइबरका बारेमा आरजेहरुको ज्ञान कतिको रहेछ भनेर त त्यति बेला नै देखियो। आरजे भन्दै थिए, कान्तिपुर एफएमको आधिकारिक साइट kfm961.com.np तर लञ्चपछिको प्रोमोमा भनियो kfm961.com मात्रै। वेब एड्रेसमा एउटा अक्षरमात्र यताउता भए पनि पेज खुल्दैन भन्ने ज्ञान नै रहेनछ उनीहरुमा। लञ्चपछि कस्तो रहेछ त साइट भनी हेरौं न भनेर हेर्दा दुवै एड्रेसमा पेज खुलेनन्। kfm961.com.np त दर्ता नै भएको रहेनछ, मर्कण्टायलको एनपी डोमेन सर्च गरी हेर्दा। kfm961.com पनि यी शब्द टाइप गरिरहँदा अपराह्न साढे १ बजेसम्म खुलेको छैन। साइट बनेकै छैन भने लञ्च गर्न किन हतार भएको हो ? कि अस्ति प्रहरीले सामान लुटेर लाँदा साइट चलाउन चाहिने कुरा पनि लुटेर लगेका हुन् ???

अध्यादेशको कडा अनुगमन गरी उल्लंघन गर्नेलाई कडा कारबाही गर्ने सरकारको चेतावनी
२०६२ कात्तिक ५ शनिबार

राजधानीमा आज कान्तिपुर एफएममा भएको आक्रमणको बारेमा चर्चा परिचर्चा भइरहेको छ। सबैले विरोध नै गरेका छन्। कान्तिपुर टेलिभिजनको प्राइम टाइम बुलेटिनमा नेपाल बार एसोसिएसनका अध्यक्ष शम्भु थापाले अन्तर्वार्ता दिँदै जुन प्रकारले तर्कसहित यो कार्यको विरोध गर्नुभयो, त्यसबाट म सबैभन्दा प्रभावित भएँ। मकरतन्त्रको चर्को विरोध गर्ने र न्यायको पक्षमा लड्ने एक व्यक्तित्वका रुपमा उहाँले आफ्नो परिचय बनाइसक्नुभएको छ। आज उहाँ भन्दै हुनुहुन्थ्यो, राति अर्काको घरमा त पस्न पाइँदै पाइँदैन। यो अहिलेको हैन राणा कालमा बनेको मुलुकी ऐनमा भएको व्यवस्था हो। उहाँले मुलुकी ऐनको धारा उद्‍धृत गर्दै सूर्य अस्ताएपछि कसैको घरमा पस्न नहुने बताउँदै नागरिक अधिकार ऐन र वर्तमान संविधानले पनि त्यस्तो व्यवस्था गरेको बताउनुभयो। “लागू पदार्थको सम्पूर्ण कार्य त्यो घरभित्र हुने भए त पस्न पाउँदैन, सञ्चार माध्यमको कार्यालयको त कुरै छाडौं। कानुनमा त बिहान सूर्य नउदाएसम्म रातभर घरलाई घेरेर मात्र राख्न पाइने व्यवस्था छ”, उहाँ भन्दै हुनुहुन्थ्यो, “रातिको समय भनेको त चोर डाँकाको समय हो” (more…)

२०६२ कात्तिक ५ शनिबार
गुगल भनेको के हो तपाईँलाई थाहा छ ? यो सर्च इञ्जिनको नाम हो भन्ने त सबैलाई थाहा छ तर गुगलको अर्थ के हो ? सय वटा शून्यको अगाडि रहेको १ लाई गुगल भनिन्छ। तर गुगल ब‌्राण्डले यति ख्याति पाएको छ कि स्वीडेनका एक दम्पतीले आफ्नो छोराको नामै गुगल राखिदिएछन्। गुगलपुत्रको वेबसाइट हेर्न यहाँ क्लिक गर्नुस्।

अपडेट-२ कान्तिपुरबाहेक इमेज एफएम ९७‌.९ ले पनि आफ्नो कार्यक्रम अपलिंक गरी पश्चिमाञ्चल र पूर्वाञ्चलमा प्रसारण गर्ने गरिरहेको थियो। पोखरामा हिजोदेखि समाचार बज्न छाड्यो रे, गीतमात्र बजाउँदैछ रे। अरु ठाउँमा इमेज एफएमको प्रसारण स्थिति कस्तो छ, थाहा हुन सकेको छैन। कान्तिपुरलाई काउन्टर दिन सरकारले नै इमेजलाई यसरी अपलिंक गर्ने अनुमति दिएको हल्ला मैले सुनेको थिएँ। इमेजलाई अनुमति असोज १८ को पहिलो “कू” पछिको सरकारले दिएको हो। कान्तिपुरलाई अपलिंकको अनुमति भने शायद गुप्ता सञ्चारमन्त्री हुँदा दिइएको थियो क्यारे। (कात्तिक ५)

अपडेट-१ यो सरकारलाई जे काम गर्न पनि राति कुर्नु पर्ने रहेछ। त्यसैले दिउँसो दुनियाँका अगाडि केही गर्न नसकेपछि राति सवा ११ बजे दर्जनौं प्रहरी जबर्जस्ती आएर कान्तिपुर एफएमको कार्यालयमा प्रवेश गरी पूर्वाञ्चलमा अपलिंक गर्न प्रयोग हुने सामान उठाएर लगेछन्। अब कान्तिपुर एफएमको प्रसारण पूर्वाञ्चलमा बन्द भएको छ। काठमाडौंमा भने प्रसारण यथावत छ।

२०६२ कात्तिक ४ शुक्रबार
सञ्चार माध्यमलाई नियन्त्रण गर्न ल्याइएको अध्यादेश पालना गराउन आज शाही सरकारले कान्तिपुर एफएममाथि भौतिक कारबाही गर्ने दुस्साहस गरे पनि त्यो सफल भने हुन सकेन। अहिले कान्तिपुर एफएम परिसरलाई घेरिरहेका सुरक्षाकर्मीहरु र सञ्चार मन्त्रालयबाट आएका अधिकारीहरु फर्किसकेको कान्तिपुर टेलिभिजनले जनाएको छ। हाल त्यहाँ संयुक्त राष्ट्रसंघ मानवाधिकार उच्चायोग कार्यालयका प्रतिनिधि, बार एसोसिएसन लगायत विभिन्न संघसंस्थाका पदाधिकारीहरु, सञ्चारकर्मीहरु र राजनीतिक दलका नेताहरु बसिरहेका छन्। (more…)

२०६२ कात्तिक ३, बिहीबार
यो दोस्रो लट भनेको डीभीको हैन नि फेरि। डीभी भर्ने कार्य त धमाधम हुँदैछ। मैले कुरा गरेको चाहिँ च्यानल नेपाल कै हो। बिना काम अफिसमा गएर हल्लिएर बस्ने जस्तो झ्याउ काम अरु नहुने रहेछ। गफैगफमा सुनिए अनुसार फेरि १८ जनालाई अवकाश दिने पत्र आउँदैछ रे दोस्रो लटमा। अनि शान्तिनगरको हेडअफिस पनि पुनः मिनभवनमा नै सर्दैछ रे तिहारपछि। आज आर्काइभ र स्टोरको क्लियरेन्स र परिचय पत्र पनि बुझाइदिएँ। अब यहाँबाट हिसाब हेरेर स्पेसटाइम नेटवर्कको लेखाशाखामा यति पैसा लिन बाँकी छ दिनू भनी सिफारिश पठाउन बाँकी रहेछ। पैसा बुझ्न चाहिँ उतै जानु पर्ने रे। त्यत्रो पैसा कसरी दिन्छ होला अफिसले ? हरेकको ६०-७० हजार बाँकी छ भन्ने सुनिन्छ। आफ्नो त त्योभन्दा बढी छ। आज काठमाडौंमा जाडो निकै बढेको छ। पानी पनि असार साउनमा भन्दा बेसीसँग परेको पर्‍यै छ। ब्लगरहरुको अनौपचारिक एकताको परिचय स्वरुप मैले “समवेदना” सन्देश पाइरहेको छु, हिजो ब्लगर नेपालका केपीले र आज युडब्लुबीका उज्ज्वलजीको समवेदना पाएँ। असत्ती एनटीसी मोबाइलको नेटवर्कले गर्दा उज्ज्वल जीको पुरुष आवाज त माघ १९ का दिनपछि सर्टवेभ रेडियोमा बीबीसी सुन्दा क्याथी र्‍याम्सको आवाज जस्तै पो सुनिएको ! मैले ल्यान्डलाइनमा फोन गर्न नम्बर टिपाएको थिएँ तर पानी परिरहेको बेला भिजेर मेटिएछ कि के हो, रिङ बजेन फेरि। नेपाल इन्फोका ब्लगर साथीले पनि हिजै च्याटबाट “समवेदना” सन्देश दिइसके। यसबीच, केही दिनदेखि ब्लग हेर्नेको संख्या ह्वात्तै बढेको रहेछ। कमेन्टहरुमा मलाई व्यक्तिगत लाञ्छना लगाउन पनि थालिएछन्। मलाई भने त्यसको वास्ता छैन। वर्डप्रेसका संस्थापक निर्माता म्याथ्यु मुलेनवेगको विचारलाई म आदर्श मानी हिँडिरहेको छु। उनी भन्छन्, ब्लग लेख्दा अरुले के सोच्लान्, त्यसको वास्ता नगर, आफूलाई के लेख्दा खुसी लाग्छ त्यही लेख। स्वयंप्रति इमान्दार भयौ भने पाठक आफसेआफ जोडिनेछन्…।

२०६२ कात्तिक २ मंगलबार
पैसा नदिएसम्म अवकाश पत्र नबुझ्ने भनेर हिजो सोचेको भए पनि हरहिसाब मिलानको लागि सबै प‌्रक्रिया अगाडि बढाउन नियमअनुसार गर्नुपर्ने काम गर्नैपर्‍यो। त्यसैले अवकाश पत्र बुझेँ। अवकाश पत्र नबुझ्नुको अर्थ निकाल्न खोज्दा पनि निस्कन नचाहने जस्तो हुने थियो। त्यसमाथि त्यो “दलदल”मा फँसेर अझै आफ्नो पैसा डुबाउनुको सट्टा खुरुक्क बाँकी रकम उठाउनु र मेरा एक पुराना सहकर्मी मित्र दीपेन्द्र लामाको शब्दमा “कुवा” बाहिर निस्कनु नै श्रेयस्कर हुन्थ्यो। मलाई अहिले सबैभन्दा बढी डर लागेको चाहिँ त्यहाँ रहेको बाँकी पैसा उठाउन नसकिएला कि भन्ने हो। सोझालाई पायो भने त जहाँ पनि हेपिने रहेछ। फेरि यसअघि छाडेका कति साथीहरुको रकम अझै पनि भुक्तान भएको छैन रे। आज सहकर्मी बालचन्द्र मिश्रको सहयोगमा कति पैसा उठाउन बाँकी रहेछ भनी हिसाब गरी हेर्दा लिन बाँकी रकम झण्डै एक लाख रहेछ। हिसाब हेर्न यहाँ क्लिक गर्नुस् बाँकी (more…)

२०६२ कात्तिक ३ बिहीबार
कति गार्‍हो छ नेपालमा पत्रकारिता गर्न…प्रमाण हेर्ने भए भित्र आउनुस्। (more…)

२०६२ कात्तिक १, मंगलबार
च्यानल नेपालको मेरो जागिर आजैका मितिदेखि लागू हुने गरी “चट” भएछ। सुनेको त थिएँ १ गतेदेखि व्यापक म्यानपावर कटौति हुँदैछ भनी। तर मलाई त थाहा पनि थिएन। बिहानको सिफ्टमा मजाले आफ्नो र अरुको पनि (मेरो काम अन्तर्राष्ट्रिय समाचारको डेस्कमा हो, समाचार बनाउने, त्यस अनुसारको भिजुअल खोज्ने अनि एडिटिङमा मिलाउने। तर अरु मान्छे नभएकोले बिहानी डेस्कका शम्भु पोखरेलले सहयोग गर्न आग्रह गरे बमोजिम अरु समाचार टाइप गरेर मिलाइदिई पावरप्वाइन्टमा स्लाइड मिलाएर पढाउन समेत सहयोग गरिरहेको थिएँ केही दिनदेखि) काम सकाएर घर फर्किसकेको थिएँ। साँझ सहकर्मी बालचन्द्र मिश्रले फोन गरेर हाजिरकपीमा मैले बिहान गरेको हाजिरलाई समेत केरेर “लेफ्ट” भनी लेखिएको छ भनेपछि मात्र थाहा पाएँ। उहाँका अनुसार “कू”मा पर्ने न्युजका अरु सहकर्मीहरुमा राधेश्याम दाहाल, मणी दाहाल, रञ्जन झा, कोमल शेरचन पनि रहेछन्। इन्टरटेनमेण्टका प्रायः सबै पनि निकालिनेमा परेका छन् रे। निकालिएकोमा भन्दा पनि अब गरिसकेको कामको पैसा कसरी उठाउने भन्ने चिन्ताले पो सताउन थाल्यो त मलाई। हिसाब गरी हेर्दा त पोहोरको असोज, कात्तिक, मंसिर, पुस, माघ, फागुन, चैत र यस वर्षको भदौ र असोज अनि स्पेसटाइममा काम गर्दाखेरीको असार, साउन र भदौ गरी एक वर्ष बराबरको तलब रकम पो उठाउन बाँकी रहेछ त। पैसा नलिई अवकाश पत्र बुझ्ने कुरा त आउँदैन। खै, कसरी, के पो गर्ने हो, म त सार्‍है दुविधामा पो परेँ त। बाँकी (more…)

चुनाव हारेका भ्रष्टाचारी गोविन्दराज जोशी पनि केन्द्रीय सदस्यमा मनोनीत
२०६२ कात्तिक १, मंगलबार
नेपाली काँग्रेसका सभापति गिरिजाप्रसाद कोइरालाले आफ्ना अनन्य भक्त तथा आफ्नै नातेदार सुशील कोइरालालाई उपसभापति मनोनीत गर्नुभएको रहेछ। आज उहाँले विधान अनुसार १८ केन्द्रीय समिति सदस्य पनि मनोनीत गर्नुभएको छ। मनोनीत सदस्यहरुको सूची हेर्दै जाँदा भ्रष्टाचारीका रुपमा बदनाम गोविन्दराज जोशीको पनि नाम देखियो। जोशी केन्द्रीय सदस्यको निर्वाचनमा हारेका थिए। काँग्रेसको विधानमा केन्द्रीय समितिमा आधा सदस्यमात्र निर्वाचित हुने र बाँकी सभापतिले मनोनयन गर्ने प्रावधान रहेको छ। सुशील कोइराला भने निर्वाचनमा सबैभन्दा बढी मत ल्याउने उम्मेदवार थिए। उनले आफूलाई रामचन्द्र पौडेलसँगै सह-महामन्त्री बनाइएकोमा घुर्की देखाउँदै राजीनामा दिएका थिए। आफ्नी छोरी सुजाता कोइरालालाई भने उहाँले अन्तर्राष्ट्रिय सम्बन्ध विभागको प्रमुख बनाउनुभएको छ। बाँकी (more…)