गत वर्ष माघ १९ को शाही कदमकाविरुध्द वासिङटन डीसीवासी नेपालीहरुले आइतबार एक विरोध र्‍यालीको आयोजना गर्दै राजतन्त्रको विरोधमा चर्का नाराबाजी गरेका छन् शाही कदमका विरुध्द अन्तराष्ट्रिय जनमत सृजना गर्नका लागि ह्वाइटहाउसअगाडि सम्पन्न विरोध र्‍यालीमा झण्डै दुई सय नेपालीहरुको सहभागिता रहेको थियो।

उक्त अवसरमा नेपालमा लोकतन्त्र बहाली, मानवअधिकारको ग्यारेन्टी, राजनीतिक बन्दीहरुको बिना शर्त रिहा, सैनिक घेराभित्र गरिन लागेको नगर निर्वाचनको स्थगन गरिनुपर्ने, माओवादी र सात दलबीचको १२ बूँदे सहमतिका आधारमा द्धन्द्ध समाधानका लागि पहल गरिनुपर्ने, प्रेस स्वतन्त्रताको बहाली लगायतका मागको नारा, प्लेकार्ड र व्यानर सहितको जुलुसले ह्वाइटहाउस अगाडि परिक्रमा गरेको थियो। (more…)

२०६२ माघ १६, आइतबार
अपडेटः शाही चुनाव एउटा ठट्टा बन्न पुगेको छ। प्राप्त पछिल्लो जानकारी अनुसार माघ २६ गते ४ हजार १ सय १६ पदका लागि चुनाव हुनुपर्नेमा आधा अर्थात् २ हजार १ सय ४ स्थान रिक्त छन्। अर्थात् त्यहाँ कसैको उम्मेदवारी परेको छैन। अब त्यहाँ माघ २६ गते निर्वाचन हुँदैन। त्यहाँका लागि छुट्टै निर्वाचन कार्यक्रम बनाइन्छ। यसरी हेर्ने हो भने अरुलाई चुनाव गराउन नसकेको भन्दै असक्षमको पदवी गुल्ट्याएर शासन सत्ता आफ्नो हातमा लिने मन्त्रिपरिषद्का अध्यक्ष आफैले पनि भनेको समयमा चुनाव गराउन नसकेको प्रष्ट भएको छ। २२ वटा नगरपालिकामा अरु उम्मेदवार नभेटिएपछि एक्ला उम्मेदवारलाई निर्विरोध विजयी भएको घोषणा गरिएको छ।

निर्वाचन आयोगले सोमबारदेखि चुनाव प्रचार प्रसार गर्ने वातावरण मिलाउन सरकारलाई भनेको छ। दस दिन बाँकी छ चुनाव, तर धेरैले उम्मेदवारको विषयमा नै थाहा पाएका छैनन्। हेरौं, अब भोलिदेखि कसरी उनीहरु ‘दुलो’ बाट बाहिर निस्केर चुनाव प्रचार गर्न आउने हुन्। स्वतन्त्र समाचार सेवाका अनुसार उम्मेदवारहरु कडा सुरक्षा घेराभित्र लुकीलुकी हिँडिरहेका छन्। स्वससेको समाचार पढ्न भित्र आउनुस्। (more…)

राजाले शासन सत्ता आफ्नो हातमा लिएको एक वर्ष पूरा हुने दिन फेब्रुअरी १ तारिखका दिन विश्वका विभिन्न देशमा विरोध प्रदर्शन तथा र्‍यालीको आयोजना हुने भएको छ। यससम्बन्धमा मलाई ईमेलबाट प्राप्त केही जानकारी यहाँ प्रस्तुत गर्दैछु। कृपया अरु केही कार्यक्रम छन् भने जानकारी पठाउन अनुरोध छ। (more…)

बसन्तपुरको यसै स्थानमा शनिबार सभा हुँदैछ। यो फोटो भने शुक्रबार कर्फ्यु लाग्नु १५ मिनेट अगाडि खिचिएको हो। अरु फोटोका लागि भित्र आउनुहोला।

सात राजनीतिक दलले शनिवार राजधानीमा विशाल जुलुस र २ बजे बसन्तपुरमा सभा गर्ने भएका छन्। शुक्रबार गर्ने भनिएको प्रदर्शन सरकारले लागू गरेको कर्फ्युका कारण प्रभावित भएकाले शनिवारलाई सारिएको हो। शनिबार पनि कर्फ्यु लागू गरिन्छ कि धरपकड मात्रै हुन्छ, त्यो भने थाहा भएको छैन। शुक्रबार रातिसम्म शनिबार बिहान ४ बजेसम्म मात्र कर्फ्यु लाग्ने बताइएको छ। (more…)

२०६२ माघ ३, सोमबार
मन्त्रीहरुले आफ्नो दल र आसेपासेलाई जिताउने षड्यन्त्र गरेको र शान्तिसुरक्षाको स्थिति नाजुक रहेकाले आसन्न नगरनिर्वाचनमा भाग नलिने घोषणा ७२ वटा साना दलले गरेको समाचार निजी क्षेत्रको समाचार समिति स्वतन्त्र समाचार सेवाले दिएको छ भने २८ साना पार्टीले निर्वाचनमा भाग लिने निर्णय गरेको समाचार सरकारी सञ्चार माध्यम राससले दिएको छ। एउटै ठाउँमा भएको कार्यक्रमलाई पनि निजी र सरकारी सञ्चार माध्यमहरुले कस्तो ठ्याक्कै उल्टो बुझिने गरी आफ्नै ढंगमा समाचार सम्प्रेषण गर्ने कार्य हाल नेपालमा भइरहेको छ भनी बुझ्न पनि तपाईँले यी दुई समाचार पढ्नु पर्ने हुन्छ। (more…)

अफ्रिकी नेशनल कांग्रेसका नेता नेल्सन मण्डेलाका सहयोगी नेता इब्राहिम इब्राहिमले नेपालका राजनीतिक दलका नेताहरुलाई गोप्य प्रशिक्षण दिएको खुलासा स्वतन्त्र समाचार सेवाले गरेको छ। उनले आन्दोलनरत सात दलका साथै राप्रपाका नेतालाई गोदावरीमा तीन दिनसम्म प्रशिक्षण दिएका रहेछन्।

प्रशिक्षणमा इब्राहिमले शान्तिपूर्ण प्रजातान्त्रिक संर्घष सञ्चालन विधि र द्वन्द्व समाधानका विषयमा प्रशिक्षण दिएको बताइएको छ।

शान्तिपूर्ण आन्दोलनबाट अफ्रिकामा जारी सशस्त्र द्वन्द्व समाधान गर्न सफल अहिंसावादी नेता मण्डेलाका सहयात्रीले दिएको सो प्रशिक्षणमा आठ दलको तर्फबाट तीन/तीन जना नेताले भाग लिएका थिए। प्रशिक्षणको विषयवस्तु र सहभागी नेताहरुको नाम समेत गोप्य राखिएको छ। (more…)

२०६२ पुस २७ बुधबार
[अपडेटः नेपाल दुरसंचार कार्यालय जनकपुर प्रमुख श्याम श्रेष्ठले स्विचिङ्ग शाखामा मुसा पसेकाले टेलिफोन र मोबाइल अवरुद्ध भएको स्वतन्त्र समाचार सेवालाई जानकारी दिएछन्। टेलिफोन विहान ११ बजेदेखि १ः३० सम्म र मोबाइल ११ बजेदेखि साढे १२३० सम्म अवरुद्ध भएको थियो]

शाही सरकारले जनकपुरमा भोलि बिहीबार हुन लागेको शान्तिपूर्ण सभाको पूर्वसन्ध्यामा आज बिहानदेखि टेलिफोन सेवा बन्द गरी आफ्नो निरंकुश चरित्र देखाएको छ। यसअघि बाग्लुङको सभामा पनि माअ‍ोवादीको भेषमा सेनालाई पठाएर ठूलै घटना गराउने असफल प्रयास गरिएको थियो। भोलि जनकपुरमा पाँच लाखलाई सडकमा उतार्ने दावी गरिएको छ।
(more…)

अपडेटः विष्णु चेम्जोङ (फोटोमा देखिएकी) नै आइतबार राति सवा ८ बजे नेपाल स्टार घोषित भएकी छिन्।
[तलको सामाग्री मेरो संसारका एक नियमित पाठक तथा शुभेच्छुक प्रसन्नको सौजन्यबाट प्राप्त भएको हो]
मेरो पूर्वानुमानमा विष्णु चेम्जोङ नै भरे बेलुका छानिने नेपाल स्टार हुनेछिन्। किनकि धरानमा नै बिहानदेखि सबै साइबर क्याफेहरू उनलाई भोट गर्नको लागि आरक्षित गरिएका छन्। त्यति मात्र कहाँ हो र एउटा ईमेलबाट एउटा मात्र भोट गर्न पाइने भए पनि केही साइटहरूबाट हुँदै नभएको ईमेल एड्रेस प्रयोग गरेर पनि भोट गर्न सकिने गरी बनाईएको छ। http://www.dharanonline.com.np यो साइट त खालि विष्णुलाई भोट गर्न मात्र बनाईएको हो। http://members.lycos.co.uk/mail यो साईट चै मैले आफै बनाएको हो। यसमा तपाइ From लेखेको ठाँऊमा From: लेखेर जे ईमेल एड्रेस लेख्नु हुन्छ पाउनेले त्यही एड्रेसबाट आएको जस्तैगरी ईमेल जान्छ। के नेपाल वान टेलिभिजनले यस्ता ठगीहरू पक्डेर सही चुनाव गर्न सक्छ? हुनत यसमा प्रतियोगीको केही दोष छैन। म मेरो साइटबाट जसलाई पनि जसको नामबाट पनि मेल गर्न सक्छु तर IP Address Track गरेर पत्ता लगाउन सकिन्छ। के नेपाल वान टेलिभिजनसँग यति धेरै समय छ? (more…)

माघ २६ गते हुन लागेको नगर निर्वाचनमा हुनसक्ने हुलदंगा र आक्रमणलाई ध्यानमा राखेर सरकारले सेनालाई विशेष तालिम दिन सुरु गरेको छ। यस्तो तालीममा ढुंगा हानाहानका घटना भएमा आफूहरु बचेर आक्रमणकारीलाई नियन्त्रणमा लिने तालिम पनि परेको छ। भक्तपुरमा सार्वजनिक बाटोमा यातायात समेत रोकी बिहीबार सेना-सेना बीच ढुंगा हानाहान गर्ने तालिम भएको रहेछ। बन्दूक बोक्ने सैनिकलाई ढुंगा हान्ने तालिमका बारेमा प्रकाशित समाचार यस्तो छ- (more…)

सर्वोच्च अदालतमा संविधान, कानून र विवेकका अनुयायी होइन, दरबारका भक्तहरुलाई न्यायमूर्ति बनाउने प्रपञ्च चलिरहेको छ । यो खेलमा न्यायाधीश नियुक्तिका लागि सिफारिस गर्ने न्यायपरिषद् यतिबेला नराम्ररी फँसेको छ । दरबारको इच्छा र निर्देशनलाई र्टार्न नसक्ने तथा शाही सरकारका कानून मन्त्रीको योजनालाई पन्छाउन नसक्ने अध्यक्षका कारण न्यायपरिषदका विवेकशील सदस्य र कर्मचारी बिलखबन्दमा परेका छन्। त्यसैले मंगलबार परिषद्का सचिव काशीराज दाहाल प्रधानन्यायाधीश दिलिपकुमार पौडेलले खोज्दा सम्पर्कमा रहेनन्। (more…)

पटक-पटक पद मोहमा परी लोकतान्त्रिक आन्दोलनलाई कमजोर पार्दै आएको राजनीतिक दलका नेताहरुलाई प्रधानमन्त्रीको लोभ त्यागेर राष्ट्रपतिका लागि तयार रहन आठ विद्यार्थी संगठनले आग्रह गरेका छन । प्रतिगमन विरुद्ध सञ्चालित आन्दोलनले राजासँग मिलन बिन्दु बन्द गरेको भन्दै विद्यार्थी नेताहरुले राजतन्त्रको अन्त्यका लागि विद्यार्थीहरु टाउकोमा कफन बाँधेर आन्दोलनमा उत्रिइसकेको बताए । (more…)

नगर निर्वाचन ध्वस्त पार्न माअ‍ोवादीका शीर्ष नेता प्रचण्ड र बाबुराम भट्टराईले संयुक्त वक्तव्य निकालेकै दिन दुवैका आमाबुबा बिरामी भएर एउटै डाक्टरकहाँ उपचार गराउन गएको संयोग जुरेछ। देश हल्लाउने व्यक्तित्वका परिवार भए पनि उहाँहरुसित उपचार गर्न आर्थिक अभाव भएका कारण डाक्टरहरुले नै व्यवस्था गरिदिनु परेको समाचार छ। (more…)

२०६२ पुस ६ बुधबार
राजाको निरंकुशताविरुध्द लडिरहेको नेपाली काँग्रेसको आफ्नै संगठनभित्र भने निरंकुशता हावी हुनु लज्जास्पद कुरा हो। यस्ता कुरालाई सुधार गर्नुको साटो झन् चर्काएर काँग्रेसले किन बेमौसमको जात्रा देखाइरहेको हो, बुझ्नै गार्‍हो छ बा। आन्दोलन चर्काउनु पर्नेमा आफैभित्रका विवाद चर्काएर कसलाई फाइदा होला ? सन्दर्भ नेविसंघको नेतृत्वको विवादको हो। पोखरामा महाधिवेशन भाँडिएको कुरा त जगजाहेरै छ। त्यसका दोषीलाई कारबाही गरी छिटो महाधिवेशन गर्नुको साटो आफ्ना आसेपासेलाई राखेर तदर्थ समिति बनाइयो। त्यसको विरोध गर्नेलाई अब कडा कारबाही गर्ने तयारी भइरहेको रहेछ। (more…)

२०६२ मंसिर १९ आइतबार
राजाको गाडी र युवराजको सवारीमा ढुंगा हानेको आरोपमा पक्राउ परेर काठमाडौंको तीनकुने प्रहरी चौकीमा राखिएकाहरुलाई यातना दिने काम भएको पुष्टि भएको छ। उनीहरुलाई आज मानवअधिकार आयोग, सरकारको छानबिन टोली र एमाले नेताहरुले भेटेका थिए। पक्राउ परेकाहरु मध्ये एक दर्जन त स्कूले कलेजका विद्यार्थी रहेको बताइएको छ। यससम्बन्धमा सरकारी सञ्चारमाध्यमले केही समाचार नदिए पनि काठमाडौं उपत्यकामा मात्र प्रसारण हुने कान्तिपुर र इमेज मेट्रो च्यानलले समाचार दिएका छन्। यहाँ मैले कान्तिपुर टेलिभिजनका लागि दीपक भट्टराईले तयार पारेको न्युज रिपोर्टलाई टीभी सेटबाट क्यामेराले रेकर्ड गरेर नेपालबाहिरका पाठकहरुका लागि प्रस्तुत गरेको छु। यो भिडियोलाई यहाँ क्लिक गरेर डाउनलोड गर्नुहोला। लिंकमा राइट क्लिक गरेर सेभ टार्गेट एज गर्नु भए पनि हुन्छ। यही घटनालाई लिएर एमालेको केन्द्रीय कार्यालय बल्खुमा हिजो आक्रमण गर्ने धम्की दिनेहरुलाई तुरुन्त कारबाही नगरे सडकबाटै त्यसको जवाफ दिने चेतावनी एमालेले दिएको छ। यही विषयलाई लिएर आज अस्कल क्याम्पस क्षेत्रमा २ घण्टा प्रहरी-विद्यार्थी भिडन्त भयो। विद्यार्थीले ढुंगा हानेका थिए भने प्रहरीले दर्जनौं टियरग्यास।
अपडेटः यो भिडियो हेर्न समस्या भएको गुनासो आएको हुँदा मैले अर्कै ठाउँमा पनि होस्ट गरेको छु। कृपया त्यसलाई हेर्न भित्र आउनुहोला। (more…)

२०६२ मंसिर १९ आइतबार
शुक्रबार मिनभवन नजिकै आफ्नो गाडीमा भएको ढुंगा प्रहारका विषयमा युवराजबाट सबै सुरक्षा निकायका प्रमुखहरुलाई एकै ठाउँमा राखी स्पष्टिकरण लिइबक्सेको छ। युवराजबाट त्यसरी स्पष्टिकरण लिन उक्साउने काम कसले गरेको थियो त ? यस सम्बन्धमा आज साँझ राजधानीबाट प्रकाशित हुने नेपालभाषाको सन्ध्या टाइम्सले एउटा समाचार प्रकाशित गरेको छ। समाचारको नेपाली अनुवाद पढ्न भित्र आउनुस्। (more…)